Distracted Driving Act dapat repasohon, sabi

Pabor an sektor nin transporte sa Bikol sa Anti-Distracted Driving Law o Acta Republica 10913, alagad kaipuhan repasohon giraray an implementing rules and regulations (IRR) asin tama sana na maghiro digdi an senado. Pati na sa pagbugtak nin santo rosario sa atubangan kan chofer ipapangalad pa kan LTO maging pagpanguros ano sinda bakong catolico? Ini an mga pahayag ni Rafael Duque, lider kan Bicol Transport Service Cooperative Federation na afuera kan isyu sa santo rosario maging an pagbugtak sana kan phones na dawa dai man gagamiton papakiaraman pa asin nagkakaigwa pa nin paribong na mga paliwanag an DOTr asin LTO asin iba pang mga isyu. Uyon kami sa RA 10913 asin tama sana an lakdang kan nagkaperang mga senador na dapat suspendiron muna an implementasyon kan ley kun igwa pang mga conflicto sa IRR, sabi pa. Nagkapera nang mga senador an nagpahayag na dapat repasohon muna an ley antes estrictong ipasunod. Sinabi pa na dapat dai man ipangalad na naka-off an CP kun nasa pagviaje alagad uyon sinda na ipangalad mientras na nagmamanijo, arog kan pag-apod asin texting. An transport group, congreso, chofer sa pampublico asin pribadong sasakyan nagpapabor na dapat suspendiron muna an ley nganing malinawan an publiko sa nagbabarangaan na paliwanag kan DOTr asin LTO sa pag-implementar kan IRR. Sa LTO Bikol, kinumpirmar ni Regional Director Atty. Noreen Lutey na puon kan Mayo 18, 2017 sainda nang pig-iimplementar an Anti-Distracted Driving Act alagad dai pa nagdetalye kun igwa na sindang nagkadarakop na mga motorista na nagsisinutil sa ley. Saro sa mga ginigibong lakdang kan LTO iyo an pagpaliwanag sa publiko kan katuyohan kan ley huli ta ini para sa seguridad man sana kan chofer maging pribado man o pampasajerong vehiculos. Sa LTO sa Ciudad nin Naga, si Eric Torrecampo Licensing Officer digdi nag-atubang sa mga chofer nin buses sa Bicol Central Station asin sa mga jeepney nganing ipaliwanag an RA 10913 na mayor na katuyohan digdi ipasabot na ma-implementar na an agencia. An oficina rehiyonal kan agencia pinahiro na an mga district office sa anom na provincias kan Kabikolan nganing magtabang sa pagpaliwanag sa estrictong pag-implementar kan ley. An mga magsisinutil cacastigohon nin multang P5,000 sa premirong pagkakalasa, P10,000 sa ika-duwang pagkakasala asin sa ika-tolong pagkakasala - P15,000 kabale na an suspension kan licencia sa pagmanijo sa laog nin tolong bulan (DPA)