ISYU SA RICE IMPORTATION: Iinvestigaran sa Congreso - Bordado

Nakasunad na sa House Committee on Agriculture and Food sa Camara-Baja an kahurotan kan congresista kan Camarines Sur na ma-investigaran an padagos na isyu sa rice importation asin aramon an kamugtakan kan mga suporta kan ahencias de gobierno sa mga paraoma nganing maseguro na suficiente an suplay nin bagas para sa food security kan mga tawo. Sa ika-sampulong privilege speech ni Congresista Gabriel H. Bordado Jr. kan tercer distrito kan Camarines Sur sa sesyon regular kan congreso, sinabi kaini na maninigo nang mag-aksyon an gobierno nacional sa reclamo kan National Food Authority (NFA) na nagkukulang na an saindang suplay nin bagas asin kaipuhan kan ahencia an dugang na stock na 250 mil metro tonelada nganing maseguro an food security sa nacion. ‘In aid of legislation’ saro sa kaipuhan nganing resolberan an isyu sa pag-angkat nin bagas bako lang mahalaga na may suporta sa paraoma envez para sa gabos na Filipino, sabi ni Bordado. Sinabi pa na perang taon nang nag-aangkat nin bagas sa ibang nacion an gobierno apesar na halangkaw an produksyon nin bagas sa Filipinas ano talaga an problema? Pinahayag man kan sarong party list congressman na dawa abunda an suplay nin bagas sa satong nacion alagad an mentalidad kan oficiales nacional magpara-angkat nin bagas. Antes kan privilege speech ni Bordado, saiyang nakaolay si Camarines Sur NFA Provincial Manager Yolanda Navarro na nagbuyagyag kan problema kan ahencias sa suplay nin bagas na bako lang digdi sa provincia envez sa enterong Filipinas na mauubosan na nin stock kan NFA rice asin maninigo nang ipadagos an pag-angkat nin bagas asin palay procurement na kaipuhan an 250 mil metrico tonelada para maseguro an food security sa nacion. An mga NFA provincial manager sa manlaen-laen na provincia sa Luzon, Visayas asin Mindanao, tinukahan kan saindang oficina central na kaolayon an mga congresista na nakakasakop sa saindang lugar na maghagad nin tabang ngaran madara sa atensyon kan gobierno nacional an problema sa rice importation. Bako lang sinda nagdudulok sa mga congresista envez sa gobernador nganing hagadan nin asistencia na madagdagan an fondo kan agencia sa lindong kan Palay Assistance from Local Government Unit and Legislature. Sinabi kan NFA na haros mayo nang mga paraoma an nagpapabakal sa sainda nin paroy mientras na sa mga pribadong comprador nagbabakal nin P18 hasta P20 cada kilo kun itatampad sa NFA na P17 sana an kilo. Saro sa lakdang kan NFA CamSur naghagad nin P2 milyon sa Capitolio Provincial nganing gibohon nang P19 an bakal ninda kan paroy sa paraoma, sabi ni Manager Navarro. (DPA)