LGU Pasacao nagpatugdok Crisis Management Center

Otso cientos mil pesos (P800,000) an fondong ginastos kan lokal na gobierno kan Pasacao, Camarines Sur nganing mai-konstruir an Crisis Management Center (CMC) na iyo an gagamiton na temporaryong dadagusan kan mga victima nin kasulo, bagyo asin kan mga mai-istranded na pasajeros pasiring sa provincia kan Masbate. Cada may calamidad dakul na mga pasajero pasiring sa San Pascual, Masbate an nai-istranded asin napalipas nin aldaw sa oficina kan Port Management Unit. Digdi man sinda dinadarahan nin pagkakan kan LGU-Pasacao bilang pagtabang sa sainda, sabi ni Alcalde Alcalde Niño Tayco Alagad dai kayang akomodaron kan nasabing oficina an dakol na istranded na pasajero orog na kun igwa nin mga aki. Sinabi pa ni Alcalde Tayco, igwa nin hiwas na 150 metros cuadrado, may double deck na higdaan, kasilyasan para sa lalaki asin babae asin puwedeng mag-akomodar nin sisenta katao an saindang CMC sa panahon na igwa nin calamidad asin kaipuhan nin temporaryong matuturogan an mga constituentes. An proyecto saro sa saiyang prioridad sa limdong kan Bottoms Up Budgetting kan taon 2014. An banwaan na ini, enot sa mga banwaan sa Bicol na igwa kan siring na facilidad bilang tabang sa mga nai-istranded na pasahero. Huli ta palaogon na an panahon nin tig –uran asin bagyo, siniguro kan jefe ejecutivo na may dagdag kaaraman na an saiyang mga kababayan orog na si yaon sa kostal na Barangay. Kan nakalihis na bakasyon nagkaigwa sinda nin Water Search and Rescue training na pinag partisiparan kan mga volunteers hale sa mga barangay na yaon sa gilid kan dagat. Makakatabang ini sa mga pagkakataon na igwang para-sira na naba-bagbag sa kadagatan kun igwa nin bagyo. (Melvin Machado)