PAGKULANG KULANG SUPLAY KAN NFA RICE SA CAMARINES SUR: NFA naghagad P2M sa Capitolio pambakal paroy

Pili, Camarines Sur – Kritikal na an suplay kan NFA rice sa Camarines Sur huli sa kawaran imported rice alagad temporaryo mahihipnoon oras na marecibe na kan agencia an P2 milyon na ayuda kan CapitolIo Provincial para sa palay procurement program nganing gamiton an cuarta sa pambakal nin paroy sa mga paraoma sa presyong P19 cada kilo envez kan dating P17, sabi kan NFA CamSur. Si Assistant Provincial Manager Nora Follosco nagsabi na naghagad sinda nin asistencia sa gobierno provincial sa lindong kan programa kan agencia sa Palay Assistance from Local Government Unit and Legislators. nganing dagdagan nin P2 an kilo kan paroy na saindang binabakal sa mga paraoma na gigibohon nang P19 cada kilo. Napag-araman kan NFA na aprobado na kan Sangguniang Panlalawigan an resolucion na nag-aawtorisar ki Gobernador Migz Villafuerte sa pagpaluwas kan sinambit na fondo. Sa pinakahuring inventaryo kan Mayo 19, 2017 sa bodega kan agencia igwa na sanang stock na 18,600 na sakong bagas na kulang na para sa sarong semana consumo sa Camarines Sur alagad marhay ngani ta suficiente an commercial rice kan mga negociante. Sinabi kan Department of Agriculture sa Bikol na padagos na self sufficient an bagas sa rehiyon cinco mantang an NFA an pigtatawan prioridad kaini iyo an food security. Sa palay procurement program kan agencia igwa sanang fondo para sa P17 cada kilo alagad apektado sinda kan mga pribadong comprador huli ta binabakal nin mas halangkaw na presyo an paroy kan mga paraoma sa cantidad na P18 hasta P20 cada kilo. An pighahalat na dos milyon pesos na tabang pinansyal kan Capitolio Provincial dakulang bagay na pueding makabakal sinda nin sagcod sa viente mil na sakong paroy kan mga paraoma, sabi pa kan NFA. Sa inventaryo kan NFA CamSur kan nakaaging aranihan kan mga bulan nin Oktubre asin Noviembre, 2016 nag-aabot sana sa cincuenta mil na sakong paroy an saindang nabakal sa mga paraoma alagad kun itatampad ini sa kaparejong bulan kan 2015 nakatungod an ahencia nin 180 mil na sakong paroy. Kan nakaaging mga bulan nin aranihan kan Marso, Abril asin Mayo 2017 nakabakal sana sinda nin 7 mil na sakong paroy alagad kun itatampad sa kaparejong peryodo kan nakaaging taon nakabakal an ahencia nin 130 mil na sakong paroy gikan sa mga paraoma sa Camarines Sur. Napag-araman kan NFA Camarines Sur na nagtugot na an saindang oficina central na mag-angkat nin bagas nganing maresolberan an kakulangan na 250 mil metroco tonelada para sa bilog na nacion. (DPA)