Pag-implementar kan Oplan Balik Eskwela, discarte na kan PDs, COPs

Ciudad nin Legaspi – Yaon na sa discarte kan mga pamayo kan PNP sa provincia asin jefe de pulicia sa mga Municipal Police Station an pag-implementar kan Oplan Balik Eskwela nganing maseguro an paz y orden sa burokasan nin clase sa Lunes, Junio 5. Taon-taon ginigibo na ini kan mga pamayo kan PNP sinda an nakaka-aram sa saindang sakop na area of responsibility si sala dapat ipatama asin si ‘best practice’ iyo an dapat gibohon, dai na digdi makikiaram an Bikol PNP. Ini an mga pahayag ni Regional Director Chief Supt. Melvin Ramon Buenafe mientras nag-aandam na an mga awtoridad sa pagmantenir kan trafico asin paz y orden sa maabot na burokasan nin clase. An kanya-kanyang jefe de pulicia orog na sa mga ciudades amay pa dapat igwa nang preparadong security plan asin pagmantenir kan trafico na saro ini sa katuyohan kan Oplan Balik Eskwela. An PNP naging envuelto na sa Brigada Eskwela asin ngonian na taon prioridad an pagtao nin seguridad sa burokasan nin klase, sabi pa kan Bikol PNP. Katuwang kan PNP iyo an mga lokal na gobierno asin Departamento de Educacion (DepEd) sa pagtarabangan na maseguro na matuninong an burokasan nin clase. Alagad sinabi pa ni Buenafe dawa igwang Oplan Balik Eskwela an campaña laban sa ilegal na droga saindang ipapadagos lalo na si paratulak nin droga sa mga pribado man asin pampublicong escuelahan. An pamayo kan Bikol PNP enot nang pigbandera an ‘full alert status’ sa Kabikolan nganing mas maging higot an seguridad matapos ideclara an martial law sa Mindanao ni Presidente Rodrigo Duterte huli kan nagpapagos na krisis sa Ciudad nin Marawi asin ini magpapadagos sa burokasan nin clase. An PNP nagbugtak na nin mga check point sa mga estratihicong lugar, dugang na police visibility sa matawong lugar, mga patrabajo kan gobierno, aeropuerto, terminal, malls, simbahan, seaports asin communication facilities kan compaña nin telepono. Katuyohan kaini nganing maseguro an paz y orden 24/7 asin maandaman an ano man na paghasok nin kariribokan. (dpa)