PNP CSur mapadarang tropa sa Mindanao

An PNP Provincial Office kan Camarines Sur andam na magpadara kan saindang tropa sa Mindanao bilang augmentation force sa nagpapadagos na krisis sa Ciudad nin Marawi alagad hinahalat nalang an ano man na directiva gikan sa saindang pinakalangkaw na cuartel general. Si Provincial Director P/Sr. Supt. Jerry Bearis nagpahayag sa Bicol Mail na an saindang miembros kan Public Safety Company preparado nganing ayudahan an elementos kan awtoridad sa Ciudad nin Marawi orog na kun maglala an ralaban kan tropa kan gobierno asin grupo kan Maute, alagad naghahalat nalang kan directiva hale ki PNP Chief Director General Ronaldo Dela Rosa. Makua pa nin dugang na fuersa an PNP Provincial Office gikan sa manlaen-laen na mga Municipal Police Station mientras na sainda nang pigpa-andam an mga jefe de pulicia kan pinakahuring directiva sa pagpadara nin augmentation force sa nangyayaring guerra kan armadong grupo kan Maute asin kan pinagsarong fuersa kan soldados asin PNP. An gabos na PNP Units kaparejo man kan mga Public Safety Company sa enterong nacion na nasa ‘’full alert status’’, sabi pa ni Bearis. An bilog na rehiyon sa Mindanao pigpasa-irarum sa Martial Law kan nakaaging semana ni Presidente Rodrigo R. Duterte matapos maghasok nin kariribokan an armadong grupo kan Maute. Labi na sa sangatos an mga binawian nin buhay na kinababalehan nin mga sibilyan, tropa kan gobierno asin Maute group. Sa Naga City Police Office (NCPO), pig-andam na ni City Director P/Sr. Supt. Julius Munez an sarong platon kan City Public Safety Company nganing ano man na oras kaipuhan sinda sa Mindanao malarga tolos base sa orden kan saindang pinakalangkaw na comandancia. Si Director General Dela Rosa nagpaluwas nin kasugoan sa mga regional director asin provincial director asin sa iba pang unit kan PNP sa nacion na magbilog kan saindang team tanganing ano man na oras na kinakaipuhan sa Ciudad nin Marawi makaabante tolos bilang mga augmentation force. An Fuersa Armada kan Filipinas sa Bikol sa pamamayo ni Major General Manolito Orense kan 9th Infantry Division na may base sa Camp Elias Angeles, Pili, Camarines Sur enot nang nagpadara nin fuersa sa Mindanao dai pa nangyayari an pagsakyada kan Maute group. (DPA)