Problema sa Lake Buhi reresolberan na kan BFAR

Si Dennis Del Soccoro, regional director kan Bureau of Fisheries and Aquatic Resources (BFAR) pig-invitaran si Rocky French, maysadiri kan Aquafarming Technology Incoporated na yaon sa Thermal City, California sa Amerika na mag-bisita sa Buhi, Camarines Sur nganing hanapan nin panghaloyan na solusyon an problema sa mga fishcages digdi. Ipinahayag na si Secretaryo Manny Pinol kan Department of Agriculture iyo an nag-endorso sa oficina rehiyonal kan BFAR Bicol na dapat saindang invitaran si French para matabangan an agencia sa paghanap nin solusyon kan problema sa fishcages. Sa mga na-enot na pag–aadal, luway luway na nagagadan an nasabing danao huli sa feeds na nagtutundag gikan sa mga pig aataman na tilapia.afuera pa sa ibang ati na nagdadalihig pasiring digdi. Kaibahan sinda Director del Socorro, French, Buhi Mayor Margie Aguinillo asin Juez Manny Congtreras kan Coast Guard Auxilliary, an nag-kundusir nin ocular inspection sa Lake Buhi para personal na mahiling an kamugtakan kan sinambit na danao. Segun ki French, siring kan ibang danao sa nacion, mayo man pagkaka iba an problema kan Lake Buhi kun saen kaipuhan iconsiderar an kakayahan kan danao na mag-acomodar nin pig aataman na sira. an calidad kan tubig an saro sa pusog na basehan para madeterminaran an kamugtakan kan danao. Sa lado kan lokal na gobierno kan Buhi Camarines Sur, sinabi man ni Alcalde Aguinillo na bukas sinda sa anuman na tabang na i-e-extendir ni French sa paagi kan BFAR, inako man kan ackalde na over-crowded na an saindang danao asin kaipuhan ining ipa intindi sa publiko orog na sa mga nag o-operar nin fishcages. Pabor man ini na sunodon an enot na rekomendasyon na diez por ciento sana kan hiwas kan Lake Buhi an gamiton para sa mga fishcages. Kasumpay kaini, pinag hahaman man ngonian kan grupo ni Juez Contreras na oficial kan Coast Guard Auxilliary sa Bicol an sarong consejo na kapareho kan Laguna Development Authority na maconcentrar sa pangangataman kan danao sa Camarines Sur.. Afuera sa tilapia, sa Lake Buhi man makukua an pinaka sadit na commercial fish na midbid sa apod na “sinarapan” o ‘’tabios’. (Melvin M. Machado)