Kakulangan classrooms, tukawan nagdadanay - sabi kan DepEd

Pili, Camarines Sur – An nagdadanay na kakulangan nin mga classroom, raraot na edificio kan escuelahan na walat ni bagyong ‘Nina’ kan Diciembre 2017 asin tukawan kan mga estudiantes iyo an man giraray an problema sa burokasan nin klase kan Junio 5 para sa school year 2017-18 , sabi kan pamayo kan Departamento de Educasyon sa Camarines Sur. Si Dr. Arnulfo Balane, Division School Superintendent kan DepEd Camarines Sur nagsabi na si mga raraot na school building na nadestroso kan nakaaging bagyo padagos nang pighihirahay kan DPWH asin igwa pang dugang na mga classroom an pigcoconstruhir na piglalaoman matatapos sa bulan ni Agosto asin Septiembre. Naglangkaw nin tres por ciento an nagpalistang mga estudiantes sa elementarya asin segundarya ngonian na school year. Kabale sa may dakulang destroso iyo an National High School sa Ocampo, Camarines Sur, nagkaperang classroom sa primer distrito, Rinconda district asin Partido area. An dagdadanay na problema sa kakulangan na mga classroom an solusyon digdi iyo an pagbugtak nin mga temporary learning center, sa kakulangan nin mga tukawan nin estudiantes tinugotan na kan DepEd an mga school principal na gamiton an fondo hale MOEA nganing ibakal nin mga mono block chair. An DepEd Camarines Sur igwang kagabsan na 1,006 na escuelahan sa limang congressional district. Sa PNP Provincial Office, sinabi ni Provincial Director Sr. Supt. Jerry Bearis naging matuninong an burokasan nin klase sa kabilogan kan provincia kasunod kan pag-implementar kan Oplan Balik Eskwela. An PNP Bikol padagos pang nasa full alert status puon na ideclara an Martial Law sa rehiyon kan Mindanao kaya ngani higot an seguridad kan mga Municipal Police Station.