NCS 1 primerong escuelahan pampubliko nagbugtak CCTV


Primero sa Bikol na an sarong escuelahan pampubliko sa elementarya sa Ciudad nin Naga nagbugtak nin sadiring Closed Circuit Television (CCTV) Camera bako sa gastos kan Departamento de Educasyon envez sa fondo kan Parent Teachers Association (PTA). Si Ferdinand ‘Ferds’ Salamat, presidente kan PTA sa Naga Central School (NCS) I nagpahayag sa Bicol Mail na an proyecto sa pagbugtak kan CCTV Camera narealisar sa pagtarabangan kan mga miembros asin oficiales kan organisasyon asin principal kan escuelahan na si Francisco Leo Damasig. Dakulang bagay sa pag-monitor kan estudiantes na malaog asin maluwas sa escuelahan asin madaling maaraman an ano man na hiro kan mararaot na elementos aldaw asin banggui o 24/7, sa madaling sabi para sa seguridad kan mga estudiantes sa elementarya asin propriedad kan escuelahan, sabi pa ni Salamat. An CCTV Camera kan NCS I igwang doceng unit na-instelar kan Mayo 28, 2017, sarong semana antes kan burokasan nin clase kan Junio 5. An monitoring room namumugtak sa oficina kan principal asin bako lang ma-aaraman an mga ginigibo kan estudiantes envez maheheling pa si ibang nagpupuling amay na paratukdo. Labi na sa tres mil an estudiantes digdi ngonian na school year 2017-2018 na gikan sa mga barangay kan Ciudad nin Naga asin maging hale sa pagtaraig na banwaan. Igwang tolong security guard an escuelahan na an sueldo gikan sa contribusyon kan miembros asin oficiales kan PTA. (DPA)