SA Metropolitan NAGA WATER DISTRICT: P8-M na lorry boat pataw-pataw sa salog

Pataw-pataw pa sa Bicol river sa Camaligan, Camarines Sur an lorry boat (LB) kan Metropolitan Naga Water District (MNWD) na naglustay nin dakulang fondo an manijamiento nin abot sa P8 milyon na kulang pa nin materialyes antes maging operational, kaipuhan pa an permiso kan Philippine Coast Guard asin icoconsulta pa sa sarong Mariners’ school sa Camarines Sur. Si Acting General Manager Virginia Nero nagpahayag sa entrevista kan Bicol Mail na sarong contratista gikan sa Manila iyo an nagtrabajo kan LB na pigpunan an proyecto kan taon 2014 alagad dai pa pig-eentrega sa manijamiento kan MNWD huli ta dai pa completo an mga piyesa nganing magamit na sa pagpabakal nin tubig sa mga consumedores sa mga barangay na nasa gilid kan salog na mayo pa nin linya nin tubo kan water district. Aagihan kan LB iyo an mga barangay sa gilid kan salog kan Gainza, Camaligan, Canaman asin Magarao. An ibang oficiales kan water district na nagsayuma nang magpaluwas kan saindang pangaran nagtutuyaw kan sinambit na proyecto mientras na dakulang cantidad an ginamit alagad dai man maaraman kun nuarin mababawi an ginastos na P8 milyon. Igwang duwang tangki an LB na pueding mapanoan sana nin hasta sa limang metros cubico an cada saro, magastos pa sa gasolina asin empleado an manijamiento nuarin mababawi an ginastos kan manijamiento? Saindang pighalimbawa an presenting lorry truck kan MNWD na may kargang diez metros cubico na ipapabakal sana ini sa commercial rate na P3,650. Sainda pig-suhestiyon kun mawot makatipid an manijamiento kan MNWD dapat nag-instelar nalang nin mga linya nin tubo palaog sa mga barangay dakulang tabang pa sa residentes na dai na kaipuhan magbakal nin tubig aroaldaw gikan sa lorry boat envez magbabayad nalang bulan-bulan kan saindang water bills. Pigbuyagyag pa na saro sa ginigibo kan manijamiento nganing makatimos nin dugang na fondo iyo an pagsingil nin additional charges sa mga developers sa water system na saro na sa nagrereclamo digdi iyo an Jamaica Realty and Marketing Corporation na nag-osip na sa Sangguniang Panlungsod nganing mag-intervener sa sinambit na isyu. An sunod na digdi iyo an planong pag-imponer nin dugang na tarifa sa consumo nin tubig, alagad an manijamiento dai paman nagkumpirmar kaini. Pinaliwanag man ni AGM Nero na katuyohan kan manijamiento sa proyecto kan LB nganing matabangan an mga residentes kan barangay sa gilid kan Bicol river na mayo pa nin mga linya nin tubo kan MNWD asin ini ‘’purely public service’’. Pig-oorgullo kan MNWD na sinda sana sa mga water district digdi sa Kabikolan an igwang lorry boat. Sinabi pa kan AGM an proyecto narealisar sa paagi nin resolucion kan junta directiva kan panahon ni Board President Fortunato Mendoza. Sa Sangguniang Panlungsod kan Ciudad nin Naga, si Consejal Cydrik Ray-An Rentoy pamayo kan Committee on Consumers Protection nagpahayag na saiyang aaramon sa manijamiento kun panong naisipan an proyecto na ginastosan nin milyones pesos na fondo. (DPA)