SA NIA: Gen. Visaya misyon sa gobierno vs kurapsyon
An paglaban sa kurapsyon sa laog kan ahencia na tugon ni Presidente Rodrigo Duterte saro sa tututokan kan dating halangkaw na pamayo kan Fuersa Armada kan Filipinas bilang bagong administrador kan National Irrigation Administration (NIA). Alagad kabale pa sa mga prioridad niya iyo an pagpakarhay kan serbisyo sa patubig, pagpaconstruhir nin bagong mga dam asin hydro power plant nganing matabangan an sektor nin paraoma. Ini an mga pahayag ni dating AFP Chief of Staff General Ricardo Visaya kan mag-atubang sa press conference sa mga miembros kan media sa Ciudad nin Naga na ginibo sa Villa Caceres Hotel. Si Visaya, dating Commanding General kan 9th Infantry Division kan Philippine Army sa Bikol antes nagpugol kan pinakalangkaw na posisyon sa fuersa armada kan nacion. Inako niya na nahihimago siya sa puesto sa NIA bilang sarong dating militar alagad sinabi kaini na kun pignombrahan siya ni Presidente Duterte huli ta mawot tututokan an campana sa kurapsyon sa laog kan ahencia. Maguiguiromduman kan Marso 2017, si Peter Laviña na dating dayupot ki Duterte nagdemiter bilang NIA administrator huli sa isyu sa pagrecibe niya nin cuarta sa contratista, alagad saiyang pinahimotikan sagcod nagdecisyon maghali sa puesto sa gobierno Sinabi man ni NIA Regional Director Vicente Vicmudo dawa dating halangkaw na oficial kan militar si Visaya alagad an saiyang pagpadalagan kan ahencia sa sibilyan an trato sa personajes. Nagtutubod an NIA Bikol na ipapadagos kan bagong administrator an dakul na mga proyecto sa patubig sa Kabikolan nganing mapaangat an produksyon nin paroy kan mga paraoma. An dating pamayo kan AFP, juespe de honor sa ginibong Bicol Farmers Congress sa sarong hotel sa ciudad kan Martes, Junio 6 na pigparticiparan kan 67 mga oficiales kan Irrigators Association. Nagkaigwa nin mass signing of the modified irrigation management transfer entre kan Irrigators Association asin NIA. An bayad sa patubig hinale na kan NIA puon kan Enero 2017 asin sa kasundoan sa irrigation management contract an asosasyon iyo an mamantenir kan irrigation canal alagad babayadan sinda kan ahencia nganing ipadagos na mapabulosan nin patubig an kaomahan kan mga paraoma. (DPA)