Soldados na nagadan sa giyera sa Marawi, tinawan hero’s welcome


Ciudad nin Legazpi - Na-amay an pagpuli sa Barangay Cogon, Gubat, Sorsogon ni Pfc Reymart Carloto, 27, gikan sa saiyang destino sa 51st Infantry Batallion sa irarom kan 1st Infantry Division Philippine Army na napapalaban sa Maute group na padagos nag-oocupar kan Ciudad nin Marawi. Sinabi ni Ria Carloto, tugang ni Reymart, dapat sa bulan pa kan Agosto mapuli an saiyang tugang nganing mag-atendir kan kapiestahan kan saindang lugar . Alagad mayo na an kaogmahan huli ta si Pfc Carloto an enot na Bikolanong soldados na binawian buhay sa nagpapadagos giyera sa Ciudad nin Marawi Lunad kan Philippine Airforce Foker Plane 10629 gikan sa Mindanao an metal casket kan bangkay ni Carloto kaibahan an tugang na si Ria asin ina na si Mrs Maria Carloto kan mag abot sa tactical operations group 5 kan Phil Airforce sa Ciudad kan Legazpi. Sarong hero’s welcome an itinao kan 901st Brigade Phil Army sa nasambit nang nagadan na soldados. Nagsabat man sinda Col. Juan Alden Masagca, Brigade Commander kan 901st Infantry Brigade na nakakasakop sa provincia kan Sorsogon asin Alcalde Noel Rosal kan Ciudad nin Legaspi asin Chairman kan Regional Peace and Order Council sa Bicol. Sa mensaje ni Rosal, bako lang mga taga Mindanao an apektado kan nangyayaring giyera kundi maging an mga Bikolano, lalo na an mga soldados na padagos naka-deploy asin nakikipaglaban siring ni Pfc. Carloto na binawian buhay. An nangyayari sa Mindanao an may dakulang epekto sa Visayas, Luzon asin sa bilog na nacion kun kaya mas marhay kun matatapos tolos ini. Si Pfc . Carloto an naglaog sa serbisyo sa 1st Infantry Division Training Unit kan taon 2014. Dati man siyang oficial kan Reserve Officer Training Corps sa Sorsogon State College. Junio dos kan mapalaban an tropa ni Pfc Carloto sa grupo kan Maute kan saindang sinasalbar an mga sibilyan. Mientrastanto, an liderato kan 9th Infantry Division Phil Army an nag midbid man kan pagbuwis nin buhay ni Carloto para sa sinumpaan niyang serbisyo sa banwaan. (Melvin Machado)