Ideolohiya causa kan giyera sa Marawi

Namumundo an Comunidad nin Muslim sa Ciudad nin Naga sa padagos na nangyayaring krisis sa Ciudad nin Marawi na nagreresulta sa dakul nang mga nagkakagaradan soldados asin sibilyan alagad causa kaini envez na magsunod sa katukdoan Islam mas ginugusto kan ibang grupo an sinasabi nindang ideolohiya. Si Abdul Qawi, paratararam kan Bicol Islamic Educational Foundation, Inc. sa Ciudad nin Naga nagpahayag na nagmamawot sinda na matapos na an giyera sa Marawi, sinda komo Filipino Muslim namumundo huli ta dapat sa sarong Muslim nagpapasunod nin katuninongan alagad igwang ibang Muslim talagang dai nagsusunod sa katukdoan kan Islam envez pinapadanay an saindang utak ideolohiya. An problema kaya sa ideolohiya suhay sa pagtubod ninda na kun padagos nagraraynar nalilingawan nang dagos an tamang katukdoan na dapat maging matuninong an tawo, sabi pa ni Qawi. Matolong semana na an giyera entre kan Maute group asin tropa kan gobierno alagad dai pa macierto kun matatapos ini antes kan pagtapos kan Ramadan sa Junio 22. Sinabi pa na kun sa Islamic teaching dapat ikondenar an grupo kan Maute na nagsakayada sa Ciudad nin Marawi, kun igwa kitang Islamic State dai sinda makakalusot sa ley, dadarakopon sinda saro-saro asin kakastigohon nin magabat na penalidad. Dinagdag pa kaini ‘’kun talagang an sinambit na grupo nag-aako na gusto ninda makobkob an lugar alagad panong mapapatubod na kita dapat mag-lider sa satong lugar kun kita mismo sa sadiri dai ta napapatubod an katukdoan’’.