SA OPERASYON KAN STL: Legal o ilegal kinokondenar kan simbahan

Nanindugan an simbahan na ano man na forma nin sugal dawa legal man o ilegal saindang kinokondenar, nagiging causa sana ini nin adiksyon arog kan nangyaring paghuromintado kan sarong adik sa casino sa Resort World sa Ciudad nin Pasay na nagresulta nin pagkakagadan kan treinta y siete katawo. Digdi sa Camarines Sur mahiwas an operasyon kan Small Town Lottery (STL) na igwang franquicia kan gobierno nacional sa paagi kan PCSO, alagad sinabi ni Padre Louie Occiano, Director kan Caceres Commission of Communication (CCOM) kan Archidiocecis nin Caceres sa Ciudad nin Naga na ‘‘not all legal are moral na dai uyon sa katukdoan kan Simbahan’’. Dai man nangangahulodan na dawa an sarong sugal legal asin dapat paboran alagad an simbahan dai kaini nag-totolerar huli ta nagiging mas delicado sa tawo kun nagdedefende nalang sa sugal sagcod nagiging adik na pig-ehemplo an nangyaring madugong incidente sa Resort World, sabi pa. Pighalimbawa pa kan simbahan arog kan Reproductive Health Law kan gobierno dai man ini nanga-ngahulogan na ‘moral’, Pigsasabi kan gobierno nacional na tinugotan an operasyon kan STL nganing mapuho na an ilegal na operasyon kan jueteng na magkakaigwa pa nin ingreso an gobierno. Alagad an sinambit na numbers game ginagamit sanang prontera kan sugal na jueteng. Sa reglamento sa operasyon kan STL dapat an mga correador nakasulot nin uniporme, igwang recibo sa pagpataya, dapat maggamit nin oficial na papel kan STL alagad ini dai man nasusunod envez si dating ginagamit na mga papel sa pagpataya sa jueteng. STL PINAPAPUNDO KAN CAPITOLYO Sarong resolucion an pinasar kan Sangguniang Panlalawigan kan Camarines Sur bako huli sa pagcontra kan simbahan envez pinapapundo an operasyon kan STL huli sa kawaran cortecia sa gobierno provincial antes nagpuon kan saindang sugal. Si Vokal Manny Noble kan Rinconada distrito iyo an nagpadreno kan resolucion na pinaboran kan gabos na miembros na presente sa sesyon regular tolong semana na an nakakaagi. Base sa Acta Republica sa operasyon kan STL, an sarong local na gobierno magkakaigwa nin tres por ciento sa makukuang gross income afuera kan itatao man na por cientaje sa Philippine National Police asin sa iba pang ahencia de gobierno. Dawa igwang marerecibing tres por ciento an LGU gikan sa gross income alagad natutuyawan kan ibang oficiales lokal huli ta dai man nagpapasunod nin transparency o silag na manijamiento an operator kun pera an saindang total na koleksyon aroaldaw. An resolucion kan Capitolyo Provincial lista sana sa dahon huli ta dai man ma-implementar kan PNP mientras na igwang permiso sa gobierno nacional an sinambit na numbers game na pigsasabing karibay kan sugal na jueteng. (DPA)