SA M.T. VILLANUEVA AVE. KAN CIUDAD NIN NAGA: Mga ilegal na estractura ipapagaba kan DPWH

June 22, 2017

 

Nagkaperang mga establisimiento de negosyo, escuelahan asin concretong kaharongan sa kalabaan kan M.T. Villanueva Ave., Ciudad nin Naga hahagupon  nganing  ipagaba kan Department of Public Works and Highways an nakalaog na mga estractura sa propriedad kan gobierno oras na iimplementar an road widening project kan tinampo nurong taon.

Sa prosupuesto sa taon 2018 ibabale na kan oficina central kan DPWH na tagamahan nin fondo sa road widening project an Villanueva Ave., asin iba pang mga national
road sa ciudad alagad defende sa aaboton na fondo kan ahencia, sabi ni Assistant District Engr. Richard Ragrario kan 2nd Engineering District kan DPWH sa Camarines Sur.

Si  Consejal Vidal Castillo, pamayo kan Committee on Infrastructure sa Sangguniang Panlungsod nagsabi  na igwa nang dating pigtagamang P237 milyon kan taon 2015 an DPWH para sa road widening project sa kalabaan kan Concepcion Pequeña, Concepcion Grande hasta sa Del Rosario asin kaayon na an Villanueva Ave. dating Kalye Liboton.

Alagad an fondo binawi kan oficina central kan obras publika huli kan panindugan kaidto kan grupo nin mga environmentalist contra sa pagpurotol kan gurangan nang kakahoyan sa gilid kan national road.

An mga road widening project saro sa prioridad kan DPWH sa 2018 tanganing mapahiwas an mga tinampo asin ini saro sa solusyon sa problema sa trafico mientras na hayapit an kadakle sa mga national road sa ciudad.

Sinabi pa ni ADE Ragrario hayapit an presenting lakbang kan Villanueva Ave. asin itatama ini sa sukol na viente metros na lakbang kaparejo kan pinapahiwas na national road kan Magsaysay Ave.

Maabot sa sarong kilometro an laba kan Villanueva Ave. hale sa canto kan Bagumbayan Sur hasta sa canto kan Peñafrancia Ave. An mga ilegal na estractura sa mag-ibong na tinampo digdi ciertong raradason na ipagaba mientras na nakalaog sinda sa propriedad kan gobierno alagad kun pribado na aagihan kan proyecto babayaran kan gobierno, sabi pa kan DPWH.

An nangyaring paggaraba kan mga ilegal na  estractura   sa ginigibong road widening project  sa  Brgy. San Felipe iyo man an iimplementar kan ahencia sa M.T. Villanueva Ave.

Kun dai pig-ulang kan mga nagpapabistong environmentalist an pagpurotol kan darakulang kakahoyon sa Concepcion Pequeña hasta sa Del Rosario dapat tapos na an proyecto arog kan pig-implementar sa Pili, Camarines Sur.

Huri nang nagpasar nin resolucion an Sangguniang Panlungsod pabor sa pagpurotol kan mga kakahoyan nganing madagos an proyecto.                                                                                                                                       (DPA)





 

Share on Facebook
Share on Twitter
Please reload