BFP Naga mabugtak sub-stations

Dawa marikas an pagresponde kan mga bombero alagad an distancia asin problema sa trafico iyo an mayor na dahilan kun dai tolos nakakaabot sa lugar kan mga insidente nin kasulo an fire truck kan Bureau of Fire Protection (BFP) kan Ciudad nin Naga, an solusyon digdi iyo an pagbugtak nin mga sub-stations. Ini an plano ni F/Supt. Alberto de Baguio, jefe kan Naga City Fire Station na saiya nang pigsumiter sa lokal na gobierno kan ciudad. An mga lugar na puedeng bugtakan iyo an Almeda Highway sa Brgy. Concepcion Grande, Barangay Sabang asin sa Barangay San Felipe alagad kun mayong espasyo digdi puedeng darahon sa Brgy. Carolina. Pig-adalanan na kan BFP Naga an mga estratihicong lugar na pueding bugtakan kan mga sub-stations na dakul an kaharongan asin sa itaas na mga barangay kan ciudad. An BFP andam na magpaluwas nin fondo para sa edificio kan sub station sa Almeda Highway kun idodonar an lote kan LGU mantang sa Brgy. Sabang nagpangako na matao nin libreng espasyo an manijamiento kan LCC mientras na naghahanap pa nin lugar sa itaas na barangay kan ciudad, sabi pa ni de Baguio. Nagkapera nang mga insidente nin kasulo apesar na marikas si responde kan Fire Station alagad nakaka-ulang sa dalagan kan fire truck iyo an problema sa trafico asin kun igwa nang mga sub-stations mapaparani na an dalagan. Igwa sindang limang fire fighting truck na iwawarak sa mga sub stations, afuera kaini sarong rescue truck, sarong rescue tender na magagamit kun igwang calamidad na pueding ihakot nin mga evacuees sa mga nababahang lugar, sarong airal ladder asin ambulansya. An City Hall nagtatabang sa Fire Station mala nganing ginastosan kan ciudad na mapakarhay an engine 3 asin engine 6 na ginagamit ngonian sa sub-station sa Brgy. Tabuco. Si de Baguio, dai palang nahahaloy na-promote na bilang F/Superintendent hale sa dating F/ Chief Inspector piglalaoman na mapugol na nin mas halangkaw na posisyon alagad naglalaom siya ipapadagos an saiyang plano kan arin man na oficial na masangle sa saiya. Siya calificado na maging provincial director, assistant regional director for administration o for operation. Afuera kaini, tinawan siya nin comendasyon kan City Hall sa ginibong 119th Independence Day huli kan saiyang marhay na mga performance, dakul na mga acomplisimiento asin kabale sa mga nominado na matawan onra sa ARTA o Anti-Red Tape Act kan Civil Service Commission. (DPA)