‘Porbaran na maggabang edificio’ patanid contra sa heridero kan Rodriguez Estate

Kalmado, dai nahahadit alagad may kasabay na pag-angat an nagkaperang negociente sa Ciudad nin Naga asin City Hall sa patanid kan naghihingako na tagapagmana na si Henry Rodriguez sa setenta y tres (73) hektarya daga na namumugtak sa Brgy. Triangulo asin Concepcion Pequeña na babawion an mahiwas na kadagaan kun dai makikipag-negociar sa sainda an mga okupante. ‘Porbaran ninda kun kayang magpagaba dawa sarong edificio’, Sabi sa patanid ni retiradong Procujurador Esperidion Solano asin iba pang negociantes na kabale sa apektado an saindang sadiring propriedad. Mayo kaming narerecibing noticia asin kun mawot bawion kan tagapagmana magplantiar nin order of execution sa corte asin magdara nin sheriff. Ini an mga comento kan negocianteng sinda Fortunato ‘Tato’ Mendoza asin Engr. Ben Sia, presidente Ruby Shelters Development Corporation, matapos mag-atubang sa press conference kan Lunes, Hunyo 26 sinda Salvacion Colarina-Bance, Atty-in-Fact ni Henry F. Rodriguez asin Rene Gomez nganing saindang ipaliwanag na pigdeclara na kan corte na si Rodriguez, iyo an heridero asin administrador kan intestate estate kan dipuntong Don Hermogenes Rodriguez y Reyes. Saindang pigbasehan an documento gikan sa Corte Suprema base sa pinaluwas na decisyon kan third division G.R. No. 182645, Entry of Judgement G.R. 140271 with certificate of finality. An propriedad sainda pang sinabi sa press conference iyo an ‘’A parcel of land covered by plan of lot 117, Cad 290, Naga Cadastre, situated at Triangulo, Naga City and Concepcion Pequeña, Naga City with and area of 73 hectaress, more or less and another 44 hectares in other Barangay’s in Naga City’. Apektado an kadagaan kan familia Mendoza sa kalabaan kan Diversion road, Ruby Shelters Development Corporation ni Engr. Sia, negocianteng Robert Obiedo asin dakul pang establisimiento maging residencia nin dating juez asin fiscal. Kabale sa mga apektado iyo an 1.2 hetaryang daga na natitindogan kan JMR Coliseum asin duwang hektaryang daga kan Bicol Central Station na parejong pigdonar sa lokal na gobierno kan Ciudad nin Naga ni Engr. Sia, SM City asin dakul pang mga edificio. Sa City Hall, sinabi ni Acting Mayor Nelson Legacion dai sinda nahahadit sa ano man na paghingako kan tagapagmana mientras na sa titulo pa sana kan caso dai kaayon an ciudad dai man kaipuhan tawan ‘pansin’ an sinambit na caso. Nagluluwas sa documento an petitioner iyo si Rene Pascual versus Jaime Robles bilang respondiente. Sa press conference ninda Colarina-Bance asin Gomez, kabale sa babawion ninda iyo an lote na natitindogan kan Bicol Central Station asin JMR Coliseum. Alagad dinagdag pa kan acting mayor na titulado na sa ngaran kan ciudad an lote na natitindogan kan duwang establismiento alagad kun kaayon sa babawion kan naghihingakong tagapagmana mayong problema huli ta dai man sinda nahahadit ta dai ngani kabale sa caso. Sinabi pa na an mga okupante igwa nin mga kanya-kanyang titulo kun igwa man nagsasabi na sainda an pigtutukdong propriedad pawaran bisa muna an titulo. Kun iayon sa papadarahan nin noticia an City Hall dai ninda oonrahon envez ibabasura sana, sabi pa kan acting mayor. Pinahayag pa ni Mendoza asin iba pang dakulang negociante sa Naga na igwa nang kaparejong caso alagad katapos-taposi biglang nawara si mga naghihingakong kagsadiri asin nagadan an isyu. (DPA)