Medical mission ‘17 sa tercer distrito kan CSur pinonan na

Pigponan na sa itaas na mga barangay kan Ciudad nin Naga an medical mission ni Congresista Gabriel H. Bordado Jr. alagad bako lang sa mga barangay kan ciudad envez maluwas sa iba pang mga lugar kan pitong banwaan kan tercer distrito kan Camarines Sur, kasabay na digdi iyo an pagconsulta sa oficiales de barangay kun ano an mawot nindang proyecto nganing matagamahan nin fondo hale sa gobierno nacional. Kan Domingo, Hunyo 25 ginibo an sarabay na medical mission ’17 sa barangay kan Panicuason, San Isidro, Carolina asin Pacol na presente an saindang oficiales de barangay na pinangenotan kan saindang Punong Barangay na sinda; Domingo Ramos, Veronica Panganiban, Alicia Saba asin Joe Mari Mercado. Si enot na rangkada kan actividades sa mga barangay ginatos na mga residentes kabale na an mga kaakian asin may mga edad na natawan nin asistencia medical asin libreng bulong. Sinabi pa na bukas an District Office kan congresista na namumugtak harani sa City Hall kun igwang mahagad nin tabang para sa scholarship, pagpabulong sa Bicol Medical Center, kun may helang sa kidney pueding darahon sa National Kidney and Transplant Institute, si may helang na kaakian na kaipuhan madara sa Manila, tatabangan na mailaog sa Philippine Children Medical Center, si iba pang may helang pueding darahon sa Philippine General Hospital asin East Asia Medical Center. Sa pag-atubang ni Bordado sa mga oficiales de barangay pinapasumiter nin resolucion kun ano an mawot nindang proyecto na kinakaipuhan nganing matagamahan nin fondo hale Department of Public Works and Highways kun ini proyecto sa infrastractura. Sinda PB Ramos kan Panicuason, PB Panganiban kan San Isidro asin PB Saba kan Carolina, anas farm to market road asin PB Mercado kan Pacol kaipuhan ninda an evacuation center. Tatawan prioridad kan apat na barangay council na magpasar na nin resolucion sa mga hinahagad na proyecto nganing isumiter na sa District Office kan congresista. (dpa)