SA FESTIVIDAD NI INA: PNP nag-aandam na sa seguridad

Homa sa terorista pig-orolayan

Sa tahaw kan nangyayaring krisis sa Mindanao, Si Bikol PNP Regional Director Chief Supt. Melvin Ramon Buenafe nagsabi na kaipuhan mag-andam an gabos na bako lang an ahencias nin awtoridad envez dapat maging envuelto an comunidad nganing maseguro an matuninong na celebrasyon kan kafiestahan ni Nuestra Señora de Peñafrancia sa bulan nin Septiembre. Ini an mga pahayag ni Buenafe sa entrevista kan Bicol Mail kasunod kan saindang ginibong maghapon na ‘’Prepare and Protect Security Awareness Workshop’’ kan Miercules, Hunyo 28 sa Avenue Hotel, Ciudad nin Naga na pigparticiparan kan mga halangkaw na oficial kan PNP, Philippine Army, CIDG, PDEA, Highway Patrol Group, mga Jefe de Pulicia asin hale sa iba pang sektores. An Bikol PNP iyo an nag-iniciar kan programa mantang palaogon na sa tolong bulan antes kan mga gigibohon na actividades sa festividad ni Ina na nilalaoman labi sa on milyon na devotos an maruso sa Ciudad nin Naga. ‘’Sa ngonian pigcoconsiderar ta an terrorist threat sa satong lugar na saro nang realidad kaipuhan maging higot sa pag-andam, sabi ngani sa tataram ni Benjamin Franklin, by failing to prepare we are preparing to failed’’, sabi pa ni Buenafe. Piglinaw kan Bikol PNP na dai pa sinda nin official report na may naglaog nang terorista sa Bikol alagad an importante maghanda an gabos sa ano man na posibleng mangyari. Sa sinambit na programa si retiradong Maj General Ariel Bernardo, pamayo kan RIC-5/RD kan National Intelligence Coordinating Agency (NICA), nagtukar man kan presenteng homa kan terorista sa nacion alagad saiyang sinabi na sa mga dakulang kafiestahan arog kan Penafrancia fiesta, an rebeldeng New People’s Army dai nakikiaram digdi. Sa Naga City Police Office, sa perang taon na nindang pag-andam sa seguridad sa kafiestahan ni Ina mayo pang record na naghasok nin kariribokan an rebeldeng NPA. Sinabi pa ni Bernardo na kan taon pang 2010 an Filipinas na kabale sa listahan nin naciones kan South East Asia dati nang plano na laogon kan Islamic State of Iraq and Syria (ISIS). An Mindanao na yaon digdi an mga Muslim an saindang problema ngonian iyo an terorista mala ngani igwa nang local ISIS na conectado digdi an Abu Sayyat asin Maute group. Saiya pang sinabi sa sinambit na workshop na kinakaipuhan magtarabangan an comunidad, LGU asin awtoridad sa paglaban sa ano man na homa sa seguridad asin importante digdi iyo an prevention. An anti-terrorist strategies saro man sa saiyang pigtukdo nganing mas maging higot an pag-andam asin paglaban sa terorismo. (DPA)