Transaksyon sa LTFRB Extension Office, paralisado


Perang bulan nang paralisado an ibang transaksyon sa Extension Office kan Land Transportation Franchising and Regulatory Board (LTFRB) sa Ciudad nin Naga matapos magdemiter asin hinale an ibang empleados digdi envez nagdestino na sana nin sarong personaje. An LTFRB Bikol sa pamamayo ni Director Jun Ablazaldo, dai palang nahahaloy mag-asumir sa puesto pigdestino muna digdi si Moises Ebardo bilang Inspector. Si dating hearing officer digdi nagdemiter kan Oktubre 2016, sarong pang namahala sa pagproceso kan pag-isyu nin franquicia nasa pag-bakasyon perang bulan na huli kan kamatean sa salud asin si iba dai na naka-renew kan saindang appointment komo casual asin job order. Si Ebardo nagsabi na ma-duwang semana pa sana siya destino sa Ciudad nin Naga hale sa oficina rehiyonal alagad an saiyang trabajo bilang inspector kan pampasajerong vehiculos na maproceso kan documentos na makua nin franquicia. An gabos na transaksyon kan documentos dapat sa saindang oficina sa Ciudad nin Legaspi, padagos na nagrereclamo orog na si mga operator na hale sa Camarines Sur asin Camarines Norte mantang kaipuhan pang magpasiring sa Albay envez na digdi sa Naga. Bulan pa nin Oktubre 2016, inabot nin Diciembre 2016 hasta sa presente paralisado an transaksyon kan extension office, alagad dai aram kan inspector kun nuarin ibubuelta an dating mga transaksyon digdi nganing dai na magastosan asin maabala an mga operator. (DPA)