Dios Mabalos saindo - RD Buenafe

Ciudad nin Legazpi - Antes an pagreretiro ni PNP Bicol Regional Director Chief Superintendent Melvin Ramon Buenafe ngonian na Hulyo, pina-abutan kaini nin pasasalamat an gabos na mga gobernador sa Bicol, Armed Forces of the Philippines particularmente an Southern Luzon Command na iyo an nakakasakop sa 9th Infantry Division kan Philippine Army, Regional Directors Association, judiciary, academe, Regional Advisory Council asin AKO Bicol Partylist . Sa “PRO5 KASUROG‘’ Recognition Ceremony sa General Camp Simeon Ola sa Ciudad kan Legazpi ipinaabot ni CSupt Buenafe an saiyang pagtao nin importansya sa suportang itinao sa saiya kan nasabing manlaenlaen na grupo na naging katuwang niya sa paglaban sa krimen sa rehiyon orog na an campaña laban sa ilegal na droga . Sa mga gobernador kan Bikol solamente si Gobernador Joseph Cua kan Catanduanes an nakaatendir mantang si iba an nagpadara na sana nin representante.Yaon man sa nasabing okasyon sinda Legazpi City Mayor Noel Rosal asin Albay 2nd district Congressman Joey Salceda. Sinabi kan Heneral na habo niyang palampason an saiyang pagreretiro na dai personal maipaabot an pasasalamat. Maging an nasa Directorial Staff kan Bicol PNP. an inumaw sa espuersos na itinao na maipasunod an mga programa kan PNP sa irarom kan saiyang liderato. Sa liderato ni Buenafe nabilog an Bicol Region Against Drug na pinag adaptar sa man iba ibang banwaan sa bilog na rehiyon sa pangengenot kan mga Municipal Police Station. Sa saiyang pagretiro, hahagadon niya sa masunod na regional director kan PNP na ipadagos ini bilang katuwang sa campaña kontra illegal na druga. Hinagad man kaini na suportahan an masunod na Regional Director kan PNP na saiyang mistah, miembro kan Philippine Military Academy Class 1986 na sarong Bikolano, alagad habo pang pangaran kan nasabing heneral. (Melvin Machado)