SA NIA BIKOL: Morosidad kan mga paraoma sa patubig nagsakat na sa P800-M

Obligadong bayaran dawa libre na an serbisyo sa patubig Nagsakat na sa P800 milyon an sisingilon kan National Irrigation Administration (NIA) na mga morosidad kan labi sa diez mil na paraoma puon pa kan 1983 sa total na cuarenta mil na mga paraoma sa sakop na pigseserbisyohan nin patubig kan agencia sa anom na provincias kan Kabikolan. Dawa libre na an serbisyo nin patubig sa presenteng administrasyon ni Presidente Duterte na nag-efecto kan Enero 2017 alagad obligado pa nindang bayadan an milyones pesos na morosidad, sabi ni Ed Yu, official spokesperson kan NIA Bikol. An gobierno nacional nagtagamang dos bilyon pesos na subsidiya sa NIA karibay kan mawawarang fondo sa coleksyon sa serbisyo sa patubig, kabale na digdi sa pansueldo sa empleados asin mga gagastoson sa operasyon kan agencia alagad ipapadagos pa an pag-colecta kan mga morosidad. Sa enterong nacion nagpapadagos pa an pag-colecta kan total na P13 bilyon na morosidad kan mga paraoma, sabi pa ni Yu. Sa 2017 General Appropriation Act an NIA igwang total na P36 bilyon na badyet. Nagpapadagos pa an pag-enmienda sa congreso kan Acta Republica 3603 na nagtutugdas kan NIA kan Hulyo 22, 1963 kan panahon ni dipuntong Presidente Diosdado Macapagal. Kabale sa hahaleon sa probisyon kan RA 3603 iyo an irrigation service fee na nag-efecto kan Enero 1, 2017 alagad mientras na nagpapadagos pa an orolay kaini sa congreso, inaprobaran muna an P2 bilyon na subsidiya sa NIA karibay kan mawawarang coleksyon sa patubig, segun pa sa parataram kan NIA Bikol. An National Confederation of Irrigators Association nanindugan contra sa paghale na kan mga back accounts kan rinibong paraoma huli ta dejado digdi si relihosong nagbabayad sa serbisyo sa patubig alagad papalibrehon lugod si dai tatao magbayad kan saindang obligasyon. Sinabi pa ni Yu na napag-araman kan NIA ki Senador Cyntia Villar, pamayo kan Committee on Agriculture sa Camara-Alta na posibleng makalusot sa Agosto 2017 an bagong bill na nag-eenmienda kan RA 3603. (DPA)