Sanitary Landfill prioridad kan LGU alagad kulang pondo

Minalabac, Camarines Sur - Igwa nang dieciseis (16) hektaryang lote na bubugtakan kan Sanitary Landfill an lokal na gobierno kan banwaan na ini bilang pagsunod sa mandato kan Acta Republica 9003 (Ecological Solid Waste Management Act of 2000) alagad kulang nin fondo nganing matapos tolos an proyecto sa premirong termino kan presenteng administrasyon ni Alcalde Cris Lizardo. Nagkapera nang LGUs an sinangatan nin caso sa Ombudsman kan Department of Environment and Natural Resources (DENR) huli kan dai pagcomple sa RA 9003, alagad sinabi ni Alcalde Lizardo na mayo na nin peligro an saindang municipio sa posibleng masunod na sasangatan nin caso sa Ombudsman mientras na kabale na sa saindang ten years development plan an proyecto sa Sanitary Landfill. Kinakarkulo na aaboton nin hasta sa P50 milyon an gagastoson sa proyecto bako lang sa aponan nin basura, envez kaipuhan pang kudalan asin iba pang facilidades, kabale na an pagbakal nin dump truck, kaipuhan pang ipaconcreto an tinampo pasiring sa Barangay Magadap na iyo an babagsakan kan mga hinakot na mga basura. An LGU igwa sanang P130 milyon na annual budget alagad pigcierto kan jefe ejecutivo sa namamanuan digdi na saiyang tatawan prioridad na matagamahan nin fondo cada taon an sanitary landfill nganing marealisar an proyecto sa saiyang administrasyon. Sinabi pa kan LGU Minalabac, saro sa plano ninda mag-utang muna sa bangko. An jefe ejecutivo asin lehislatura sa pamamayo ni Bise Alcalde Pedro Benamira nagtatarabangan sa pagpadalagan kan gobierno lokal mala ngani na-ipasar tolos an P6 million na appropriation ordinance para sa pambakal nin 16 hektaryang daga sa Barangay Magadap na igwang distanciang quince kilometros hale sa centro kan banwaan. An RA 9003 diecisiete (17) años na alagad digdi sa Bikol an lokal na gobierno kan Ciudad nin Legaspi iyo pa sana an nakacomple sa ley. An DENR nagpaluwas nang memorandum sa LGUs na dapat magsunod na sa RA 9003, an reclamo kan dakul na mga LGUs nagiging estricto na an DENR sa pag-implementar kan ley, dai man sindang pigtataong ayudang fondo nganing gamiton sa proyecto. Magsunod man sa ley an LGUs alagad tikapo sa fondo nganing mapadale an milyones pesos na proyecto, sabi pa kan ibang mga alcalde sa Camarines Sur. (dpa)