MNWD dapat mag-aksyon na vs contratista kan lorry boat


Sarong dating director kan Metropolitan Naga Water District (MNWD) kan Ciudad nin Naga, hinahagad sa manijamiento na suratan nang patanid an contratista kan ocho milyon pesos na lorry boat na ma-sarong taon nang pataw-pataw sa Bicol river sa Camaligan, Camarines Sur alagad sagcod sa ngonian dai pa nagdadalagan. Si Socorro Felix, dating director kan MNWD sa laog nin diez y ocho años na nagrepresentar kan sektor nin kababaehan asin sarong taon nang nagpahingalo sa posisyon nagsabi na dapat maggibo nang aksyon an manijamiento na pinamamayohan ni Acting General Manager Virginia Nero asin Board President George Palma huli ta sayang kan ginastos na P8 milyon kan manijamiento kan water district. Antes maging operational an lorry boat kaipuhan pang mag-isyu nin permiso an Philippine Coast Guard alagad dai pa ini marerealisar huli ta kulang pang mga gamit nganing mag-andar, sabi pa kan dating director. Ipinahayag pa an contratista kan proyecto taga Manila, na dai naman pigngaranan. An lorry boat na pueding kargahan nin sampulong metro cubicong tubig nganing magsuplay nin tubig sa mga barangay alagad ipapabakal sa consumedores na nasa gilid kan salog sa mga municipalidad kan Camaligan, Gainza, Canaman asin Magarao, gabos sakop kan manijamiento kan MNWD. Alagad an ibang opisyales kan MNWD na nakiolay sa Bicol Mail dai na ibuyagyag an saindang pangaran naghihinayang sa ginastos na labi sa P8 milyon huli ta mayo man nin asegurasyon na magkakaigwa sinda nin ingreso digdi mientras na kulang sa pag-aadal kun panong mababawi tolos an binutasan na dakulang fondo kan water district. Sinabi man ni Felix an proyecto na-implementar kan panahon ninda dating Board President Fortunato ‘Tato’ Mendoza na naggibo muna sinda nin feasibility study antes pigfondohan an ipapagibong lorry boat asin aprobado kan Local Water Utilities Administration (LWUA). (dpa)