SA MGA RESIDENTES KAN BRGY. PALESTINA: Ipapagibong sanitary land fill iba sa open dumpsite

An lokal na gobierno kan Ciudad nin Naga nagseguro sa mga residentes kan Barangay Palestina, Pili, Camarines Sur na dai man sinda ma-aapekaran kan ipapagibong aponan nin basura sa Barangay San Isidro sa ciudad na ini huli ta bako man open dumpsite an proyecto envez sanitary landfill. Sinabi ninda Bise Alcalde Nelson Legacion asin Consejal Salvador del Castillo, pamayo kan Committee on Environment and Energy sa Sanggunian Panlungsod na haloy nang inadalan kan City Hall asin Department of Environment and Natural Resources (DENR) an iimplementar na proyecto sagcod na nagpaapod nin mga public hearing an ciudad na inatendiran pa kan opisyales de barangay kan Palestina asin kan manlaen-laen na sektor kan Naga. An ipapagibong sanitary land fill kun aaponan nin basura nganing maseguro na dai mag-alisngaw an parong kaini, tinatahoban tolos nin daga alagad sa lado kan open dumpsite dai na ini ginigibo arog kan presenteng basurahan sa Barangay Balatas, sabi pa ninda Legacion asin del Castillo. An reaksyon na ini kan City Hall kasimbagan sa pinaluwas na pagcontra ni Punong Barangay Efren Amisola kan Brgy. Palestina na nagpahayag na saindang pigcocontra na gibohon na aponan nin basura an Brgy. San Isidro kan ciudad na kataid sana kan saindang barangay. Pigbuyagyag man ni Consejal del Castillo na kan magkaigwa sinda nin public hearing presente an Punong Brgy kan Palestina na pinaliwanag kan komite an pagkakaiba kan sanitary land fill asin dumpsite. Dinagdag pa kan bise alcalde kun dai nag-agi sa tamang proceso na gagastosan nin milyones pesos an proyecto kan City Hall dai man matugot an DENR na ponan na an implementasyon kaini. Preparado an City Hall na ipaliwanag sa mga residentes kan Brgy. Palestina an pagkakaiba kan sanitary land fill asin open dumpsite, sabi pa. An proyecto na pigtagamahan nin P268 milyon kan City Hall mamumugtak sa zona siete kan Brgy. San Isidro na nakatalaan nang ipasubasta an pagconstruhir nin kudal, mapagibo pa nin tinampo na aagihan kan hinahakot na basura kan mga dump truck. Nakatalaan nang sarahan an setente por ciento kan hiwas sa Balatas dumpsite na nagpapadagos pa an patrabajo na pigponan kan Abril 2017 asin piglalaoman matatapos sa laog nin anom na bulan. (DPA)