Intel Div kan NCPO naghihirinib sa mga hiro-hiro kan evacuees

Abot na sa Ciudad nin Naga an nagdudurolag na residentes gikan sa nagkaperang mga barangay sa Ciudad nin Marawi huli kan dai matapos-tapos na giyera digdi, alagad an Intelligence Division kan Naga City Police Office (NCPO) naghihirinib kan saindang mga hiro-hiro para sa seguridad kan ciudad. Puon kan Hunyo uno, siyam na aldaw kan magputok an giyera kan Mayo 23 hasta kan nagtalikod na semana padagos an pag-arabotan kan mga evacuees na igwa nang kagabsan na 12 familia asin 66 na mga persona mantang piglalaoman na madugang pa ini sa mga masunod na semana. Mayoria sa sainda yaon sa Barangay Lerma asin dikit sana an nakidagos sa Muslim Community sa Brgy. Concepcion Pequena. Si SPO2 Tobias Bongon, opisyal na parataram kan NCPO nagpahayag na an saindang Intelligence Division iyo an nagkua kan mga pangaran kan evacuees asin nag-investigar nganing maseguro na mayong puedeng dudahan na envuelto sa misyon kan ISIS. Entero sindang pigserne kun saen naghahaling mga barangay, kun anong mga trabajo, siisay an mga partidariyos sa Muslim Community, an saindang mga familia asin kun panong nakadalagan sa Ciudad nin Naga, sabi pa kan NCPO. Lihitimo sindang evacuees na mayong halong envuelto sa giyera sa Ciudad nin Marawi na hale sa mga barangay kan Ambolong, East Caloocan, Libod, Madaya asin Lodig. Kadakle sa sainda mga saradit na negociante kan maghale sa Marawi na planong ipadagos digdi para sa pagbuhay kan saindang familia na mawot nang magtenir sa Naga. Si mga estudiantes nagpadagos kan saindang pag-escuela sa Camarines Sur National High School asin Tinago National High School na tinugotan kan DepEd nganing magpadagos kan saindang pag-adal. An comunidad nin mga Muslim sa Ciudad nin Naga kinokondenar an padagos na paghasok nin kariribokan kan Maute group na apektado na an pagbuhay kan saindang mga tugang na Muslim sa Marawi asin mayo nang babalikan na estaran. (dpa)