Pasyente sa Drug Rehab Center sa CSur nagbaba

Kabaligtaran kan piglalaoman na masuroksokan an mga pasyente kan Department of Health-Camarines Sur Treatment and Rehabilitation Center (DOH-CSTRC) sa Brgy. Pamukid, San Fernando, Camarines Sur envez nagbaba puon na higot na iimplementar kan administrasyon ni Presidente Rodrigo Duterte an giyera laban sa droga. Si Ma. Lourdes Anson, jefe kan drug rehabilitation sa Camarines Sur nagpahayag sa Bicol Mail kun dati nagaabot sa 147 an saindang mga paciente na lolong sa droga alagad sa ngonian igwa na sanang 92 na an cuarenta (40) por ciento kaini gikan sa Ciudad nin Naga. Ngalas man an manijamiento sa hospital kan pag-ina kan saindang mga pasyente apesar na kan mga nakaaging bulan nagkaperang mga lokal na gobierno an naghahapot sa sainda kan proceso sa pagdara nin mga pasyente na lolong sa droga. Mandato sa ley na dapat igwang bitbit na court order an mga ilalaog na pasyente dawa na nagsadiring iniciativo na maglaog sa rehabilitasyon. Rinibong mga nagsurokong dorogista sa LGUs asin sa PNP, bako man gabos dapat sindang ilaog sa rehabilitation center alagad an iba posibleng nagpundo na kan saindang paggamit nin droga huli kan campaña kan gobierno contra sa ilegal na droga dawa na ngani an iba nagpapadagos pa sa paggamit kaini. Sagcod sa 18ng bulan an rehabilitasyon kan saindang pasyente na anas lalaki mantang an mga babae dinadara sa Malinao Rehabilitation Center sa provincia nin Albay. Cantidad P3,500 bulan-bulan an bayad kan cada pasyente alagad kun tios na familia dai na obligado na magbayad, sabi pa ni Anson. (dpa)