‘Buhay kan tawo o kahoy’ - LGU Corte nag-isyu TEPO vs DPWH

Nanindugan an lokal na gobierno kan Ciudad nin Naga na pabor sa publiko an saindang kahurotan na dapat purotolon na an mga ulang na darakulang kakahoyan sa gilid kan mga tinampo sa ginigibong road widening projects kan Department of Public Works and Highways (DPWH) nganing maibitaran an nangyayaring mga aksidente sa trafico asin bako pang perwisyo kun may calamidad. Arin an bentaje ‘buhay kan tawo o kahoy’ ini an reaksyon ni Consejal Salvador Del Castillo, pamayo kan Committee on Environment sa Sangguniang Panlungsod sa mga nagpo-protestang grupo contra sa ginigibong pagputol kan DPWH sa mga ulang na kahoy sa proyecto. Si Del Castillo, padreno kan pinasar na resolucion kan SP kan Enero 17, 2017 na pinapaboran na an pagpurotol kan DPWH asin pagtaong permiso kan DENR nganing makabuelo sa mga pig-iimplementar na road widening projects. Kun nagkakaigwang makusog na mga bagyo dakulang perwisyo sa publiko huli ta nagkakaturomba ini sa tahaw kan tinampo kadamay pa an poste kan cooperativa nin electricidad na naresulta nin halawig na mga brownout na mayo man ginigibo an nagpapamidmid na mga environmentalist. Alagad an grupo kan mga nago-protesta nakapuntos contra sa City Hall asin DPWH matapos magpaluwas nin Temporary Environmental Protection Order (TEPO) an corte na pundohon muna an pagpurotol kan mga kahoy. An orden pinaluwas ni Juez Leo Intia kan Regional Trial Court branch 27 sa ciudad asin nagpahayag man an 2nd Engineering District kan DPWH sa paagi ni Assistant District Engr. Richard Ragrario asin Consejal Del Castillo na saindang pigrerespeto an desisyon kan jusgado. An grupo kan Sulog, 651 asin iba pang environmentalist padagos nag-cocontra sa pagpurotol kan kakahoyan na pigpunan na sa Magsaysay Avenue. Si Edgardo Castro, principal petitioner sa paghagad nin TEPO sa corte naglinaw na dai man sinda nag-uulang sa proyecto alagad katuyohan ninda nganing mapreserbar an gurangan nang kakahoyan mantang ini iyo an nag-aabsorber kan carbon dioxide. Naglalaom sinda na mapaluwas nin permanteng orden an jusgado. Mayong consultasyon sa publiko antes pig-implementar an permiso kan DENR sa pagpurotol kan kakahoyan, an kahoy bakong perwisyo alagad kaipuhan an disiplina kan mga motorista, sabi pa.