HULI SA GIYERA VS DROGA: Ibang kriminalidad walat na sa mga prioridad kan PNP

Calabanga, Camarines Sur – An ginigibong pagtutok sana sa giyera contra sa droga saro sa dahilan kun napapabayaan kan Municipal Police Station (MPS) digdi an campaña laban sa ibang mga kriminalidad na nangyayari pa sa atubangan kan publiko. Prueba kaini sarong negociante sa mercado publiko an victima nin robbery hold- up na dagos nang binadil gadan kan duwang riding in-tandem na nakadulag sa mata kan awtoridad mantang pera sanang metros an distancia kan Police Station sa pinangyarihan kan krimen. Ini an mga tuyaw ni Bise Alcalde Ramon Robles sa MPS na pinamamayohan ni Chief Inspector, Chief of Police Ace Christian Mendoza matapos badilon gadan kan duwang hold-upper an victima na si Mrs. Thelma Hipolito. Mayong nagpapatrolyang kapupulisan sa mercado publiko kaya buelo an mga may planong mararaot na elemento, apesar nagdugang na ngani an miembros kan MPS. Disganado an LGU sa liderato ni Mendoza asin hahagadon sa higher command kan PNP naribayan an saindang jefe de pulicia. Nasabatan kan mga nag-responding kapupulian an kaggibo kan krimen mientras na lunad sa motorsiklo nagdudolag, alagad dai ninda aram na iyo na palang idto si mga hold-upper. An paliwanag kan MPS hale palang sinda sa anti-gambling operation alagad huri nang nakaresponde sa lugar kan krimen na nakabuelong makadulag an mga suspechado. An insidente nangyari mga alas 6:00 nin banggui kan Sabado, Agosto 5 mientras na nagbibilang kan cuarta na kabaklan sa saindang Rice Store, duwang suspechado an nagrani na fuersahan inagaw si cuarta na nag-aabot sa sangatos mil pesos alagad dai pa nacontento binadil gadan an victima kan saro sa mga suspechado. Dakul pang mga parasaod sa mercado publiko alagad mayong destinong pulis kaya nakabuelo an kaggibo kan krimen. Sinabi kan jefe de pulicia na igwa na sindang pugol kan footage gikan sa CCTV camera na iyo an saindang papasikadan nganing mabisto asin sangatan caso mga kriminal. Matagama nin P100 mil an Sangguniang Bayan bilang pabuya sa siisay man na makakatukdo, makakadakop buhay man o gadan sa responsable sa krimen, sabi pa kan bise alcalde. Nakatalaan ipaapod kan SB an jefe de pulicia nganing aramon kun ano an saindang mga ginigibong plano laban sa mga kriminalidad bako lang sa ilegal na droga asin resulta kan investigasyon sa caso.