Pag-okag kan mga PDs pinunan na kan Bicol PNP

Ciudad nin Legazpi – Matapos magtukaw an bagong pamayo kan Bikol PNP, piglalaoman na maimplementar man ini nin pag-okag kan mga provincial director sa iba pang mga provincia kan Kabikolan asin dai palang nahahaloy pinunan na sa PNP Provincial Office kan Sorsogon. Naghahalat sana nin directiva an mga provincial director sa provincia alagad dai paman pigbuyagyag ni Regional Director Chief Supt. Antonio Gardiola Jr. kun siisay an isusunod na riribayan na pamayo kan PNP matapos enot na mahale sa PPO Sorsogon si Sr. Supt. Ronaldo Cabral na sinanglian ni Sr. Supt. Marlon Tejada, dating pamayo kan CIDG sa Bikol. Sinabi ni Gardiola na normal sana sa saindang organisasyon an pag-okag kan mga pamayo na dawa sain madestino kun ini kinakaipuhan orog na kun labi na sa duwang taon sa saiyang destino dawa marhay an saindang performance. Kadakle kan mga provincial director sa Bikol nagtutukaw bilang acting PD kabale na si Sr. Supt. Jerry Bearis kan PPO Camarines Sur. Antes niribayan sa puesto si PD Cabral napili bilang Best Provincial Office sa Filipinas an PNP Provincial Office kan Sorsogon asin dakulang angat sa bagong liderato ni Tejada na mamantenir an onra na narecibe kan PPO. Saro sa directiva kan Bikol PNP sa bagong pamayo kan PPO Sorsogon na dapat maging doble alerto sa pagsubaybay kan posibleng paglaog kan mga terorista sa Matnog Port. Afuera pa kaini, ipadagos an giyera laban sa ilegal na droga na pueding ipulsit sa Puerto kan Matnog asin sa mga barangay na sagcod sa ngonian dai pa declarado bilang drug cleared barangay. An directiva kan Bikol sa kapupulisan sa Kabikolan dapat ipadagos an campaña laban sa droga na saro sa prioridad kan administrasyon ni Presidente Rodrigo Duterte, paglaban sa ano man na kriminalidad nganing macierto an katuninongan kan rehiyon.