Pagsibog kan pirilian sa Brgy, SK yaon na sa bola kan senado

Yaon na sa senado kun saindang papaboran an pagsibog kan Barangay asin Sangguniang Kabataan elections matapos aprobaran sa caucus kan Camara-Baja na gibohon na an pirilian sa Mayo 20, 2018 envez kan pigtalaan kan Commission on Election sa Oktubre 23, 2017. Si Representante Rodel Batocabe kan Ako Bicol Partylist nagpahayag sa entrevista kan Bicol Mail magpapadagos an termino kan opisyales de barangay hasta sa pirilian nurong taon sa paagi kan hold over capacity base sa resulta sa caucus kan congreso. An Malacañan iyo an nagtulod na dapat isibog an barangay election huli kan report na maabot sa cuarenta (40) por ciento kan opisyales de barangay sa nacion envuelto sa ilegal na droga asin dakula an posibilidad na maglaog digdi an inaapod na narco-politics. An AKB kabale sa nagsuporta sa pag-uktaba kan pirilian, nagsabi pa na igilid na kan congreso an debate sa pagnombra kan opisyales de barangay mientras na malawig pa an proceso sa pag-enmienda kan Local Government Code. Alagad si mga envueltong opisyal sa barangay an sasangatan nin caso sa pagbalga kan Comprehensive Dangerous Drugs Act of 2002, sabi pa. An Liga ng mga Barangay sa Ciudad nin Naga sa pamamayo ni Punong Barangay Tomas Ramon Sanchez kan Brgy San Francisco nagpahayag na papaboran sa senado an pag-uktaba kan pirilian mientras na mayoria sa sainda kaalyado ni Presidente Rodrigo Duterte. Ipinahayag pa ni Sanchez na an saindang National Liga na pinamamayohan ni Atty. Edmund Abesamis nagpaluwas nin manifesto asin pigsumiter sa Malacañan asin Congreso na nagcocontra sa pagnombra nin bagong opisyales de barangay karibay kan mapaso na sa termino. Tinawan prioridad kan 17th Congress an sinangat na prouestong ley nganing dai na aboton sa bulan nin Oktubre 2017 makalusot na an ley sa liwat na pag-uktaba kan pirilian. Si Alex Marpuri, parataram kan Comelec Camarines Sur nagsabi magpapadagos sinda sa preparasyon kan pirilian sagcod na mayo pang aprobadong ley an Malacañan. Halat sana kan Comelec an pinal na desisyon kun talagang dagos nang isisibog an pirilian. (DPA)