2 gadan, 2 arestado sa buy bust operations


Duwa an mga itinumba asin duwa man an nadakop sa magkasuhay na drug buy bust operations sa laog nin siyam na oras na pigconducir kan pinagsarong fuersa kan mga elementos kan Regional Drug Enforcement Unit (RDEU) asin City Drug Enforcement Unit (CDEU) kan Philippine National Police sa mga Barangay kan Cararayan asin Mabolo sa Ciudad nin Naga. An mga nagadan asin nadakop anas dati nang nagsuko sa Oplan Tokhang alagad nagpapadagos kan saindang actividad sa ilegal na droga. Sa ginibong enot na operasyon mga alas 3:00 nin hapon, Agosto 15 sa Brgy. Cararayan, sinabi ni SPO2 Tobias Bongon, parataram kan Naga City Police Office an mga nagadan sa operasyon sa Sitio San Rafael, Cararayan huli kan pagprobar na magtomang sa awtoridad iyo sinda Orlando Gabriel Jr. a.k.a ‘Manor’, 24 años, soltero, taga Sitio San Rafael asin Jefrey Palomares y Gutierez, 35 años, soltero taga Brgy. San Roque, Calabanga, Camarines Sur na igwa nang enot na mandamiento de arestar huli sa pagbalga kan RA 9165 asin naarestar si Julius Niño Villacarlos y Kimson, 36, soltero, sarong call center agent asin residente kan Brgy. San Jose, Pili, Camarines Sur. Nasamsan sa laog kan residencia kan suspechadong drug pusher na si ‘Manor’ iyo an mga plastic sachet na may laog nin puting crystalline substance nin shabu na dai paman pigsabi kun perang gramos, sarong dai maaraman na calibre nin badil, sarong calibre 38, mga bala kan armas, balisong asin iba pang mga paraphernalia sa ilegal na droga. An mga nagsakyadan awtoridad pinangenotan kan RDEU na pinamamayohan ni Sr. Inspector Louie Ordonez, CDEU na pinamamayohan ni P/Inspector Mark Joel Gamboa, Police Station 4 Drug Enforcement Unit sa pamamayo ni Chief Inspector Marlon Antang asin personajes kan Calabanga Police Station sa superbisyon ni City Director Sr. Supt. Jonathan Panganiban sa coordinasyon sa PDEA Bikol. An sunod na operasyon ginibo mga alas 12:30 nin maagahon, Agosto 16 sa Zona 1, Brgy. Mabolo na naarestar si Richard Millares y Orobia, a.k.a ‘Itat’, 38, may agom asin nagtatrabajo bilang porter. An buy-bust operasyon digdi pinangenotan ni Sr. Inspector Louie Ordonez kan RDEU asin Sr. Inspector Mark Joel Gamboa kan CDEU asin Chief Inspector Josefa Sylvia Zape. Nasamsam sa suspechado iyo an duwang pidasong plastic sachet, cantidad P620 asin iba pang mga gamit sa ilegal na droga. An mga naarestar yaon na sa custodiya kan NCPO asin sinangat na an caso sa pagbalga kan R.A. 9165 o mas midmid sa Comprehensive Dangerous Drug Act of 2002. (dpa)