Commuter train kan PNR Bikol padagos an viaje dawa nalulugi

Magpapadagos kan regular na viaje an commuter train kan Philippine National Railways (PNR) sa Ciudad nin Naga dawa milyon pesos na an nalulugi perang taon na an nakakaagi mantang sarong service oriented an companya. Sagcod na mayong directiva si PNR General Manager Junn Magno na magpundo na muna kan saindang viaje huli kan sinasapong kalugihan magpapadagos an commuter train na an ruta haling Naga PNR Station, na nahapit sa Pamplona, Libmanan hasta Sipocot PNR Station. Si Division Manager Jose Florece kan PNR Naga nagpahayag na inaabot nin P600 mil an saindang coleksyon cada bulan kun icocompara sa P750 mil sa operating expenses na kabale an mga PNR Station sa Pamplona, Libmanan asin Sipocot. An kakulangan na P150 mil sinusustento kan saindang oficina central nganing magpadagos kan saindang operasyon aro-aldaw. Sa cada bulan inaabot nin docientos cincuenta mil (250,00) an saindang pasajeros na treinta pesos sana an flete haling Sipocot PNR Station sundo sa Naga PNR Station. Naglangkaw sana an saindang ingreso kan magbuelta si viaje kan tren Naga-Legazpi asin Legazpi-Naga kan Septiembre 2015 alagad perang bulan naparalisar an viaje huli kan problema sa kakulangan nin kotse asin dapat irehabilitar na mga relis haling Camarines Sur sundo sa Albay. Si loma pang sinisingil na flete iyo an saindang pinapadagos dawa na ngani naglangkaw na an presyo kan produkto nin petrolyo asin gastos sa pagmantenir kan mga kotse asin relis kan perrokaril, sabi pa. Pera nang administrasyon an nagpangako na tatawan nin prioridad an mayor na rehabilitasyon kan perrokaril sa mga linya kaini haling Tugegarao hasta sa Matnog, Sorsogon alagad dai man narerealisar. (dpa)