Mga PB, parokya, PPS pabor purotolon na an kakahoyan

Matapos magreclamo an environmental group contra sa padagos na pagpurotol kan DPWH sa mga gurangan nang kakahoyan sa gilid kan mga tinampo sa national highway, pinaluwas na kan City Hall na igwa man grupo naghuhurot na purotolan na an mga kakahoyan na ulang sa tinampo na nagiging causa sana nin daños kun narapado an mga calamidad. Saro pa sa katuyohan nganing ma-implementar na kan ahencia an mga road widening project sa national road. Pigbuyagyag ni Bise Alcalde Nelson Legacion na doceng mga Punong Barangay (PB), limang Parokya asin limang Parish Pastoral Council (PPC) nagpadara nin surat sa Sangguniang Panlungsod na panahon nang iimplementar an mga lakdang asin iimplementar sa paagi nin local legislation na mahale an mga ulang asin nakaka-apektar pa sa publiko kun igwang natural calamities. An mga surat saindang narecibe kan bulan nin Febrero 2017, duwang bulan o kan Diciembre 2016 matapos kan paglamasa ni bagyong Nina sa Bikol. Matapos kan bagyo naheling kan publiko an dakulang destroso kan mga natombang kakahoyan na naka-apektar sa linya kan mga poste kan cooperativa nin electricidad sagcod nawaran bulos nin corriente na igwa nganing mga lugar na inabot nin duwang bulan mayong ilaw. Afuera kaini paralisado an viaje kan mga motorista mantang nakakaulang an nagkaturombang kahoy sa tahaw kan tinampo. Alagad sinabi man ni Consejal Salvador Del Castillo pamayo kan Committee on Environment sa Sangguniang Panlungsod na igwa na sindang inaprobaran na resolucion kan Enero 17, 2017 na naghuhurot sa DENR asin DPWH na panahon nang haralion an mga kakayohan sa gilid kan tinampo nganing ma-implementar na an mga road widening projects. An mga surat pirmado ninda Punong Barangay Tomas Ramon Sanchez, Jr. kan San Francisco, Joshua Calleja kan Dayangdang, Milagros Magalona kan Tinago, Alfonso Rodriguez kan San Felipe, Jefrey Moralde kan Peñafrancia, Salvacion Ortua kan Liboton, Regina Alcantara kan Del Rosario, Leticia Punzalan kan Concepcion Grande, Rodrigo Agravante Jr. kan Cararayan, Veronica Panganiban kan San Isidro, Lorenzo Narvaez kan Sta Cruz asin Jorge Salva Jr. kan Bagumbayan Sur. Kabale sa mga nakapirma sinda Rev. Msgr. Noe Badiola, Parish Priest, St. John the Evangelist Metropolitan Cathedral, Fr. Hanz Christian Borbor, Parish Priest kan Mater Salutis Parish, Fr. Wilmer Joseph Tria, Parish Priest kan St. Jude Thaddeus Parish, Rev. Fr. Rey Jose Rellora, Parish Priest kan Our Lady of Peñafrancia Parish, asin Fr. Arkie Caceres, Parish Priest kan St. Francis of Assisi Parish. Sa grupo kan Parish Pastoral Council kinababalehan ninda Erlinda Belen, Geraldine Alvina, Atty. Avelino Sales Jr., Carlos Marcera asin Cecilia Pardo. Afuera kan pagpabor sa pagpurotol kan kakahoyan nganing ma-implementar na an road widening projects sa national road, saindang hinahagad na dai na tugotan an pagtanum kan nagdadarakulang kakahoyan arog kan acacia asin gmelina sa mga local asin national road. Pigtutulod ninda an pagtanom nin indigenous trees arog kan narra, molave, yakal asin iba pang frutas na papakinabangan kan publiko. Nakapuntos an environmental group matapos paboran kan corte an saindang peticion na mag-isyu nin Temporary Environmental Protection Order contra sa DPWH. An reclamo sinangat ni Edgardo Castro asin iba pang mga representante kan ‘They Grey, We Green’.