Pirilian sa Brgy, SK padagos pig-aandaman kan Comelec

Nagpapadagos pa an mga naka-kalendaryo actividades kan Commission on Election (Comelec) dawa lusot pa sana Camara-Baja an pagsibog kan Barangay asin Sangguniang Kabataan elections sa Mayo 20, 2018 asin maagi sa debate sa senado an propuestong ley kun paboran digdi asin isasakat pa sa Malacañan. Si Abogado Maico Julia Jr. Election Officer sa Ciudad nin Naga nagsabi na base sa resolucion kan Comelec Central Office pigtalaan ninda sa Agosto 25, 2017 an posting kan mga listahan kan mga votantes na makakaparticiar sa pirilian sa Brgy. asin SK. Ini kasunod kan saindang ginigibong pag-andam sa nakatalaan na pirilian sa Oktubre 23 ngonian na taon na sagcod na dai pa inaaprobaran sa senado asin sa Malacañan an pagsibog kan pirilian dai sinda mapundo kan mga actividades. Pig-aandam na an subasta kan mga election paraphernalia na gagamiton sa pirilian asin sa bulan nin Septiembre masikad na an pag-ensayo kan mga paratukdo na maserbe bilang mga board of elections inspector (BEI). Gigibohon na mano-mano an pirilian asin iginilid na muna an automation. Ano man na pinal na desisyon kan Malacañan mayo sindang magiginibo i-atras an mga preparasyon sa pirilian, sabi pa kan Comelec. Kan nakaaging semana pinaboran sa congreso an pagsibog liwat kan pirilian sa Mayo 20, 2018 envez kan nakatalaan na petsa 23 kan Oktubre ngonian na taon. An National Liga ng mga Barangay naogma sa desisyon kan congreso mantang dai na mangyayari an posibleng pagnombra na sa opisyales de barangay na saindang pusog na pigcontra base sa sindang pinaluwas na manifesto na pinadara sa duwang camara. Afuera pa kaini, mapapalawig an saindang torno orog na si mapaso na an saindang termino asin discalificado nang mag-re election. Nagtutubod an liga na makakalusot man giraray sa senado an huli ta mismo si Presidente Rodrigo Duterte iyo an naghurot na dapat isibog an nakatalaan na pirilian.