SODA ni Bordado sarong istoriko, sabi

Sarong istoriko sa tercer distrito kan Camarines Sur asin Filipinas na an congresista nag-atubang sa manlaen-laen na sektores asin opisyales lokal nganing ipaabot an saiyang mga acomplisimiento bilang lehislador asin mga naginibohan sa konstituyentes sa paagi kan State of the District Address (SODA). Ini an mga reaksyon ninda Bise Alcalde Rolando Eduardo kan LGU Camaligan, Bise Alcalde Eddie Alteza kan LGU, Bombon, nagkaperang miembros kan People’s Council, Brgy. Pacol Punong Barangay Jose Mari Mercado kan Naga asin Consejal Julian Lavadia Jr kan SP Naga. Nagpaabot man kan saiyang reaksyon si Consejal Mila Raquid-Arroyo kan City Hall na dakulang bagay an ginibo kan congresista huli ta bako lang panahon nin eleksyon naatubang sa tawo envez nabalik sa saiyang distrito nganing ipaabot an mga naginibohan. Sinabi ni Eduardo ‘very excellent perfomance’ huli ta pigbentilar si gabos na mga naginibohan puon na maglaog sa 17th congress sagcod sa pagtapos kan premirong taon. Premirong record ini sa Filipinas na nagkaigwa nin SODA alagad igwa pang kulang, sabi pa sa mga reaksyon. Ginigibo an saiyang trabajo bilang lehislador asin toltol sa trabajo mala ngani mayong palta sa mga sesyon asin pinapaagi pa sa social media an mga ginigibo kaini, sabi man ni Bise Alcalde Alteza. Dai man mandato sa ley na an congresista maggibo kan saiyang SODA bakong arog kan Presidente kan nacion na obligado huli ta ini pigmamando sa konstitusyon kan Filipinas. Alagad sinabi ni Congresista Gabriel H. Bordado Jr. sa pagtubod niya responsibilidad kaini na ipaaram sa mga konstituyentes kun ano an mga naginibohan asin ano pa an mga mangyayari sa distrito asin dangogon an feedback hale sa publiko. Sa legislative work nakaatendir sa 97 sesyon regular na mayong palta, authored/co-authored sa 93 na bills na kadakle sa local applications nakalusot na sa third reading, 10 mga privilege speeches, limang manifestation on the floor mientras na pigbiklad man kaini an mga naginibohan sa mga konstituyentes. An iba pang summary of accomplisments yaon sa pahina tres. An SODA ginibo kan Sabado, Agosto 12 sa Euro Hotel, Ciudad nin Naga na kabale sa nag-atendir an mga opisyales kan TESDA, DOLE, mga alcalde, bise alcalde asin mga miembros kan Sanggunian Bayan asin Sanggunian Panglunsod kan Naga.