SABI KAN BAYAN BIKOL: Mga pagkondenar sa panggagadan ki Kian tanda nang nakaka-alarma

Nagpapahiling na nakakaalarma na an mga nangyayaring garadanan sa nasyon kun an simbahan naghihiro na nganing ikondenar an panggagadan sa menor de edad na estudyante kan senior high school sa Ciudad nin Caloocan. Digdi sa Ciudad nin Naga asin Camarines Sur, an mga pahayag ni Arzobispo Rolando Tria Tirona kan Archidiocesis nin Caceres nagpapahiling man kan nakakaalarmang garadanan sa nasyon, sabi kan Bayan Bikol. Bako nang makatutubod sa simbahan an mga alegasyon kan PNP sa mga nangyayaring panggagadan sa biktima. Si James Casilihan, lider kan Bayan Bikol nagpahayag na sa pagpuon pa sana kan mga sunod-sunod na panggagadan sa laog kan presenting administrasyon Duterte orog na an mga nangyayaring extrajudicial killings asin mga caso sa human rights violation padagos an saindang pagkondenar huli ta bako nang makatawo an pagtapos kan buhay sa mga biktima. Sa saindang pinaluwas na statement ‘’kikokondenar kan Bayan-Bikol an panggagadan ki Kian Loyd Delos Santos asin an extrajudicial killings dulot kan war on drugs, all-out war, war against the Moro. Dapat paninbagon an mga envueltong State Security Forces, dapat kondenaron asin tumangon an pasismo kan Estado asin dapat manindugan an mga namamanuan contra sa teranya kan Estado. Justicia para ki Kian asin sa gabos na biktima nin EJK’’. Sinabi man ni Tess Pielago kan Makabayan Bikol na nagsusuporta sinda sa pangapodan sa namamanuan na magpariticipar sa gigibohon na mga indignation rallies asin iba pang aksyon puon kan Agosto 21 hasta sa Septiembre 21 huli kan nag-gragrabe nang pasismo kan Estado, padagos na mga nangyayaring pagbalga sa deretso pang tawo. Nangapodan sinda sa mga biktima kan giyera contra droga asin martial law na magluwas sa pagkasararo laban sa kumon na kalaban. Justice for Kian! Justice for all!.