Zero iskuwater sa Naga sa 2022 - Kgd Lavadia


Padagos na pigtutulod ni Consejal Julian Lavadia Jr., miembro kan Committee on Urban Poor sa Sangguniang Panlungsod an mas concretong programa sa housing masterplan nganing marealisar an target na dapat gabos na familia sa Ciudad nin Naga may sadiring nang harong sa 2022. Si Lavadia, dating pamayo kan Liga ng mga Barangay sa ciudad antes naging regular na miembro kan SP nagsabi na aram niya an kamugtakan kan pagbuhay kan mga informal settler o dating inaapod na iskuwater na parating nahahadit kun saen mabalyo estaran kun igwang demolition order an jusgado. Yaon an Socialized Housing and Finance, National Housing Authority, Housing Urban Development Coordinating Council asin iba pang ahencias de gobierno envez na bako lang gikan sa caja kan lokal na gobierno kan ciudad mientras na kaipuhan an milyones pesos na fondo digdi. Sa paagi kan saiyang privilege speech sa sesyon regular kan sangguniang kan Martes, Agosto 22 saiyang tinawan atensyon na dapat punan na kan lokal na gobierno an paghanap nin paagi nganing marealisar na maging ‘’Informal Settler Family (ISF) free’’ na an ciudad sa 2022. Sa saiyang mensaje sa ginibong actividad sa ika-31 aniversaryo kan Naga City Urban Poor Federation, pigbiklad kaini an sinambit na plano nganing matapos na an problema sa iskuwater. Presente sa programa sinda Congresista Gabby Bordado, Trisha Robredo, aki ni VP Leni Robredo asin opisyales lokal kan ciudad sa pamamayo ninda Alcalde John Bongat asin Bise Alcalde Nelson Legacion. NAGDULOK NA SA MGA AHENCIAS DE GOBIERNO Naghahanap siya nin solusyon sa paagi kan mga ginigibong coordinasyon sa regional coordinator kan HUDCC, NHA asin sa paagi kan Socialized Housing and Finance makakahagad nin fondo nganing mahipnoan an maabot sa P350 milyon para sa plano kaini na maging ISF free an ciudad. Sangatos hektarya an kaipuhan na lote nganing itabang sa mga informal settler. MAABOT PA SA 13K MGA ISKUWATER SA NAGA Base sa saiyang pigtiripon na datus hale sa mga ahencia kan NHA, HUDCC asin Housing Settlement and Development Office kan City Hall maabot pa sa trece mil an mga iskuwater sa ciudad. Sa ngonian igwa nang cinco mil na mga aplicanteng familia sa oficina kan HSDO. Sinabi pa kan consejal an mga iskuwater sa ngonian rinibo pa an yaon sa laog kan lote kan PNR, mga naapektaran kan nakaaging bagyong Nina asin sa iba pang mga barangay kan ciudad. Sa pakikipag-olay ni Lavadia ki Engr. Christine Abano, regional coordinator kan HUDCC, ipinahayag na madale na an proceso sa City Hall mantang igwa nang Local Shelter Plan na kaipuhan na gibohon iyo na magkaigwa nin LSP training workshop asin LSP writeshop. Ini na an mga paagi nganing matawan nang solusyon an problema sa pagpaharong na iyo an paagi nganing ideclara ISF Free Naga 2022. An HUDCC Bikol matalaan nin training workshop sa maabot na Septiembre 20 hasta 22, 2017. An programa sa urban poor saro sa pigtawan prioridad ni dipuntong DILG Secretary Jesse Robredo kan siya alcalde pa kan ciudad asin dapat ipadagos an saiyang legacia, sabi pa ni Lavadia.