‘’No relocation, no demolition’’ nagdanay kun dai nagsinutil an mga apektadong familia asin interben

Kun dai nakipaglaban asin naging matagas an panindugan kan treinta mga familia asin ginibong interbensiyon ni Bise Alcalde Nelson Legacion contra sa demolition order kan Department of Agrarian Reform Adjudication Board (DARAB) pirit kuta nang na-implementar an paggaraba kan treinte (30) kaharongan sa Barangay Cararayan, Ciudad nin Naga. Nagkaperang apektadong familia nagpahayag sa entrevista kan Bicol Mail alagad habo nang magpasambit kan saindang pangaran nagsabi na dakulang bagay na nakaabot tolos sa lugar ninda an bise alcalde nganing magtahaw asin paliwanagan an demolition team kan DAR Bikol na dai pueding iimplementar kan sheriff an orden sagcod na dai nakokomple an proceso sa pag-demolition na ‘’no relocation, no demolition’’. Resulta kaini, an Presidential Commission for the Urban Poor (PCUP) sa paagi ni Chief Operations Rodel Francisco kan Malacañan nagpaluwas ni directiva ki Chief Supt. Antonio Gardiola Jr. kan Bicol PNP asin sa DAR Regional Sheriff Eliezer Arenas na dai dapat iimplementar an demolition order huli kan estrictong policia ni Presidente Duterte na ‘’No Relocation, No Demolition’’. Si Regional Sheriff Eliezer Arenas kan DAR Bikol iyo an ma-implementar kan demolition order sa Brgy. Cararayan kan Agosto 10, 2017 alagad naglumoy sa tahaw kan nangyayaring tensyon kan magkaigwa nin orolay asin an apekatadong mga familia na tawan pa sinda nin sarong semana asin sa ginibong interbensyon ni Legacion. An bise alcalde nakipag-olay sa abogado kan DAR na avisohan an saindang sheriff na sagcod na dai nasusunod an kasugoan ni Presidente Rodrigo Duterte na ‘’no relocation, no demolition’’ dai dapat iimplementar an orden. An bise alcalde iyo an nag-informar ki Robert Bonifacio kan PCUP na iyo an may obligasyon na pagtabang sa mga familia encaso mayo nang paagi sa desisyon kan DARAB. Afuera pa kaini, saiyang sinabihan si Acting City Director Sr. Supt. Jonathan Panganiban na dai pueding iimplementar an demolition order sagcod na mayo pang nangyayaring pre-demolition conference. An PCUP iyo an may mandato na makiaram asin magpa-apod nin pre-demolition conference antes iimplementar an desisyon kan DARAB. Pigpaliwanag pa kan bise alcalde an gabos na envueltong tawo sa sinambit na caso asin maninigong ahencias de gobierno pigsusugo na hanapan nin solusyon base sa pigmamando kan Executive Order 152 na enmiendado sa irarum kan E.O. 708. Mayoria kan treinta apektadong mga familia klasificado bilang inaapod na underprivileged and homeless citizens sa iraum kan Acta Republika 7279 na mas midmid sa Urban Development Housing Act. Si Wilson Luz iyo an presenting kagsadiri na kan envuletong katorce hektarya propriedad na binakal sa orihinal na kagsadiri na si Manuel Abella. (DPA)