NPA BIKOL: Nagkakalap bagong miembros sa Naga

An mga estudyantes asin jovenes iyo an pirmeng target na pigkakalap kan kumunistang grupo nganing maging miembro kan New People’s Army na madaling mapatubod kan mga ideolohiya na napuon sa pag-miembro kan League of Filipino Students (LFS), alagad kulang man an saindang nakokombinsir. Ini an pigbuyagyag ni Army Capt. Randy Llunar, opisyal na parataram kan 9th Infantry Division kan Philippine Army sa Bikol na may base sa Camp Elias Angeles, Brgy. San Jose Pili, Camarines Sur kasunod kan nagkaperang mga etiketa na nag-aalok sa jovenes na magbale sa NPA, na pinadukot sa poste kan Casureco II asin estabisimiento de negosyo harani sa mga universidad sa Ciudad nin Naga. Sa subersibo an gibong ini asin pwedeng sangatan nin caso kriminal an arin man na grupo o indibidwal na madadakop kan awtoridad, sabi pa kan opisyal kan militar. Sa etiketa nakasurat an ‘’Kabataan Paglingkuran an Sambayanan!, Sumapi sa NPA. Kabataan Makabayan – Bikol. Nagtutubod an opisyal kan militar na an nasa likod kaini iyo an LFS huli ta madaling mapatubod an estudyantes alagad bibihira naman an nagsusuporta nganing mag-miembro sa NPA mientras na prioridad ninda iyo an edukasyon asin para sa saindang futuro. Sa Naga City Police Offfice, sinabi ni spokesperson SP02 Tobias Bongon an saro sa mga etiketa pinadukot harani sa Police Station 1 sa Plaza Quezon asin perang lakad sana pasiring sa University of Nueva Caceres na sainda nang pinahale. Kabale pa sa mga pigkakalap na mag-ayon sa organisasyon kan rebeldeng grupo iyo an jovenes sa hararayong barangay orog na si nasa tios na familia na madale man na maniobra mientras kulang sinda sa edukasyon. Posibleng nakakabuelo ngonian an pagkalap nin bagong miembros kan NPA mantang nakakatutok ngonian an Fuersa Armada kan Filipinas sa nagpapadagos na giyera sa Ciudad nin Marawi, sabi pa Alagad sinabi pa ni Llunar na dai man sinda nagpapabaya asin padagos na naghihiro an saindang intelligence group laban sa mga operasyon sa armadong grupo na kalaban kan estado. Afuera kaini, nagluloya na an fuersa kan mga rebeldeng NPA mala ngani puon kan Febrero hasta kan Hunyo ngonian na taon treinta y cuatro nang rebelde gikan sa Masbate an nagsuko nganing isikwal na an organisasyon kan rebeldeng grupo. Igwa pang iba na hale sa Camarines Sur, Norte, Albay asin Sorsogon. An 9th ID padagos kan saindang obligasyon nganing makontrolan an movimiento kan mga rebelde para sa seguridad kan namamanuan asin futuro kan jovenes asin estudyantes, sabi pa ni Llunar. Si mga rebel returnees tinatabangan kan gobierno sa paagi nin mga seminar para sa livelihood project mientras na ginigibo na an pagproceso kan mga papeles para sa saindang financial assistance na nagcacantidad nin P50 mil. An iba na-ensayo para maging activong soldados kan gobierno asin Cafgu.