SA LAOG NIN DUWANG ORAS: LTO nakakadakop 200 na nagsisinutil sa ley trafico

Sa laog sana nin duwang oras an law enforcers kan Land Transportation Office (LTO) nakakadakop nin dos cientos katorceng (214) mga chofer nin vehiculos sa Ciudad nin Naga sana na nagsisinutil sa ley trafico na kadakle digdi mga motorsiklo asin pribadong sasakyan. Digdi naprobaran kan ahencia na dakul an mga dai disiplinadong chofer, maging kagsadiri na bako lang sa codego nasyonal an dai pigsusunod envez maging ordinansa kan lokal na gobierno. Kun naglawig si oras sa operasyon an law enforcers posibleng magsobra pa sa quinientos an pwedeng magkadarakop. Afuera pa kaini, kun mas magiging estricto an deputized na mga traffic officer kan PNP dakul pa an magkakadarakop. Sinabi ni Mar Jose Magistrado, Chief Operations Officer kan LTO Bikol kan nakaaging Agosto 22, 23 nagkaigwa sindang training seminar sa quinceng mga lady law enforcers kan ahencia na ginibo sa Ciudad nin Naga gikan sa manlaen-laen na distrito office, matapos kan duwang aldaw na seminar pigbanga sa apat na grupo si veinte neive (29) enforcers nganing iimplementar an leyes sa trafico lokal man o nasyonal na nagresulta sa 214 mga traffic violators an saindang nagkadarakop. Kabale sa mga nagkadarakop si dai rehistradong sasakyan na igwang multa diez mil pesos asin dos mil pesos o doce mil pesos gabos na pinatong na si mga multa, mayong standard helmet, pagpasuno sa motorsiklo nin sobra sa duwa asin iba pang mga pagbalga base sa Joint Administrative Order kan LTO asin Land Transportation Franchising and Regulatory Board (LTFRB). Estricto nang pig-iimplementar an Acta Republica 10066 na prohibido an menor de edad na pasunoon sa likod kan chofer kan motorsiklo asin limitado sana sa duwang lunad kabale an nakasangkay sa likod asin dai pa pinatawad si mayong side mirror na may multang on mil pesos, sabi pa kan LTO Bikol. Sa nakatalaan na pag-implementar kan pag-isyu nin five year validity sa licensiya sa pagmanijo kan nagtalikod na bulan an mga empleados kan mga district office na iyo an nagkakapot sa pag-isyu nin bagong licensiya pina-atendir muna sa seminar sa Manila nganing mas maparikas an pag-proceso sa mga aplikante. Pabor ini sa mga chofer orog na sa nagmamanijo nin pampasajerong sasakyan, sabi pa. (DPA)