2 seksyon kan poultry, piggery ordinance pig-veto ni Bongat

Pinaboran ni VM Legacion Iginilid muna kan Sangguniang Panlungsod kan Ciudad nin Naga an debate sa desisyon ni Alcalde John Bongat sa pag-veto kan duwang seksyon kan Poultry and Piggery Ordinance No. 2017-053 enves pinasa sa Committee on Agriculture na pinamamayohan ni Consejal Julian Lavadia Jr. An seksyon 6 asin 7 kan Articulo II nagtutugot sa expansion kan mga poultry asin piggery farm maging si mga bagong kaparejong establisimiento, alagad dai uyon an jefe ejecutivo asin ibinalik sa SP nag-iinformar sa pag-veto kan duwang seksyon sa pinadarang surat kan Agosto 21 na pinaboran ni Bise Alcalde Nelson Legacion an pigsumiter na rekomendasyon kan alcalde. Alagad pigpaliwanag kan alcalde na base sa saiyang consultasyon sa mga habitantes asin sa barangay council kan Panicuason asin sentimiento kan publiko pabor para sa perpetual ban asin expansion kan presenting poultry farm establishment asin contra sa mga bagong mabugtak. Pigrekomendar kan alcalde sa SP envez kan mawot mangyari sa seksyon 6 asin 7 saiyang pigtutulod an perpetual ban sa pagbugtak pa nin bagong commercial poultry asin piggery farm asin maimponer nin penalidad contra sa mga operator na dai masunod kaini. Sa ika-duwang seksyon pigtutulod man na dapat gibohon nang perpetual ban asin expansion kan mga rehistradong commercial backyard na igwang validong business permit. Afuera pa kaini prohibido an pagpahiwas kan edipisyo asin dai na tutugotan an pagpatindog nin bago. Pinahayag ni Legacion na pabor siya sa rekomendasyon kan alcalde huli ta obligasyon magdesisyon an lokal na gobierno para sa karahayan kan gabos. Sa sesyon kan SP kan Martes, Septiembre 5 si Consejal Gregorio Esteban Abonal iyo an nagtukaw na presiding officer mantang si Legacion nagtukaw muna bilang acting city mayor mientras na yaon siya sa opisyal na viaje sa Indonesia si Bongat. Si Consejal Miles Raquid-Arroyo, padreno kan sinambit na ordinansa asin iba pang consejal dai uyon sa aksyon kan alcalde na i-veto an duwang seksyon kan ordinansa.. Nagkasurondo an ibang consejales na adalan muna an desisyon asin mga rekomendasyon kan jefe ejecutivo envez pinasa sa Agriculture Committee.