Orihinal na estaran ni Ina mahalaga sa Simbahan

An pagtao nin importansya sa orihinal na estaran ni Ina na dating namumugtak sa sarong kapilya na yaon sa pampang kan salog an dahilan kun tano ta pigpapadagos an pagpoon kan traslacion prusisyon hali sa nasambit na simbahan pasiring sa Naga Metropolitan Cathedral enves sa Basilica Minore. An estaran kan Imahen ni Ina ibinalyo na sa bagong Peñafrancia Basilica Minore kan taon 1985, alagad alas 4:00 nin aga antes kan hapon na traslacion ginigibo an prusisyon hale sa Basilica nganing darahon sa orihinal na estaran ni Ina na iyo an Peñafrancia Shrine. An traslacion iyo an pagbalyo kan ladawan kan Divino Rostro asin kan Imahen ni Nuestra Senora De Peñafrancia hale sa Basilica pasiring sa Cathedral. Si Padre Louie Occiano, Director kan Caceres Commission on Communication (CCOM) nagpahayag sa Bicol Mail nangyari ini kan tercentenary celebration kan taon 2010 sa panahon ni Most Rev. Leonardo Z. Legaspi, Arzobispo kan Archidiocesis nin Caceres asin exaktong ika-pitong taon na sa gigibohon na traslacion prusisyon ki Ina sa Septiembre 8, 2017. An kapinonan asin dahilan kan traslacion nganing mas lalong mapabanal an nagdadakol na mga devoto, pinagmarhay kaidto ni Msgr. Manuel Grijaldo, sarong Augustian (1848-1861 na ibalyo an taon na pagnovena ki Ina hale sa sadit na kapilya na ngonian iyo na an Peñafrancia Shrine. Ini an kapinonan asin dahilan kan traslacion. An Arzobispo kan Caceres iyo an nasabat sa pag-abot kan traslacion na pigpahumale kan Rector kan Basilica kaiba an kapadian asin mga seminarista na nagbulig kan andas kan Imahen kan Division Rostro hale sa Peñafrancia shrine. Ini bilang pag-utob kan panuga kan mga lideres kan Simbahan na pinangenotan kaidto ni Msgr. Casimiro Herera kan Agosto 26, 1882 kan makalibre an Kabikolan sa Cholera Morbo. Sarong istorikal an punto digdi kan simbahan nganing tawan kahalagahan an orihinal na estaran kan Ina na idagdag pa digdi an pagpa-construhir kan Plaza Miguel de, sabi ni Padre Occiano. An Basilica na iyo na ngonian an pig-eestaran ni Ina pinag-dedicar kan Mayo 2, 1985 asin kan Septiembre sa kaparejong taon digdi na nahale an traslacion alagad an desisyon kan simbahan imantenir sa orihinal na pig-estaran ni Ina. Ini pinagdeklara na National Shrine sa paagi ni Ricardo Cardinal Vidal, DD para sa Catholic Bishop’s Conference of the Philippines sa Hulyo 12, 1987. (dpa)