PAG-IMBENTARYO KAN MGA POSTE SA NAT’L ROAD: 3 surat kan DPWH sa Casureco II dai pigsisimbag

Canaman, Camarines Sur – An Department of Public Works and Highways (DPWH), 3rd Engineering District tolong veces nang nagsurat sa Camarines Sur II Electric Cooperative (Casureco II) na hinahagad sa manijamiento kan cooperativa na magkaigwa sinda nin sabay na imbentaryo kan mga poste na apektado sa nagpapadagos na mga road widening project nganing maaraman kun pera an babayadan kan obras publika alagad sagcod sa ngonian mayo pang kasimbagan. Igwa nang directiva an opisina central kan obras publika na dapat magkaigwa sinda nin joint inventory kan cooperativa nin electricidad nganing matagamahan nin fondo kan ahencia alagad dai maaraman an dahilan kun tano ta mayo pang kasimbagan sa tolong veces nang follow-up na surat, sabi ni District Engr. Rebeca Roces sa entrevista kan Bicol Mail. Igwa nang pinaluwas na kasundoan an Department of Energy asin DPWH base sa pinaluwas na memorandum kan ika-duwang semana kan Hulyo 2017 na papasanon na kan obras publika an gastos sa pagbalyo kan mga poste na apektado sa mga ginigibong road widening project. Sa laog kan bulan nin Hulyo asin Agosto ngonian na taon an DPWH nagpadara nin surat ki Project Supervisor/Acting General Manager Nelson Lalas na hinahagad na magtalaan sinda nin joint inventory alagad dai nagsisimbag sa surat, sabi pa. Sinabi pa ni DE Roces mientras na pighahalat ninda an implementing rules and regulations (IRR) bilang antisipasyon dapat magkaigwa na sinda nin mga imbentaryo asin makua na sa Casureco II kun gurano an presyo nganing pag-andaman nin fondo kan ahencia alagad dai pa nag-cocooperar an manijamiento kan cooperativa nin electricidad. An plano kan DPWH kun dai sisimbagon an saindang surat, mapadara na sinda nin personajes sa opisina ni PS/AGM Lalas para magtalaan sinda nin aldaw para sa sinambit na katuyohan. Dai pa makuanan nin lado an Casureco II mientras na mayo sa opisina si PS/AGM Lalas, an sabi yaon sa Manila mantang mayo na sinda nin parapahayag matapos magdemiter sa puesto bilang PIO si Rolando Pante. Si director elect kan Naga North District, Angelino Cornelio Jr. kan makaulay kan BM sa paagi nin telepono nagsabi na kun maka-atendir na siya sa board meeting saiyang ihahapot an isyung ini. An mga poste kan cooperativa nin electricidad na nakalaog sa tinampo kan national highway dakulang ulang sa trafico huli ta igwa nang mga lugar na tapos na an road widening alagad dakul an ulang na mga estractura. Si Consejal Vidal Castillo, pamayo kan Committee on Infrastracture sa Sangguniang Panlungsod kan Ciudad nin Naga haloy nang nagtutuyaw kan mga ulang na poste sa mga national road huli ta delicado sa mga aksidente sa trafico alagad dai nag-cocooperar an manijamiento kan Casureco II. (DPA)