Bomba nakua sa kaduotan, nagtago dakop kan NCPO

Tolong aldaw antes kan fluvial procession sa imahen ni Nuestra Señora de Peñafrancia sa Sabado, Septiembre 16 tolong mga improvised explosive devices (IED), sarong badil, lighter asin iba pang personal na kagamitan na winalat sa kaduotan an nasamsam kan elementos kan Naga City Police Office sa Sitio Magapo gapo, Villa Virginia, Subdivision kan Barangay Concepcion Pequeña. Posibleng gamiton sa Ciudad nin Naga ngonian na Peñafrancia fiesta o sa luwas kan ciudad alagad padagos pang pig-iinvestigaran kan NCPO an pigtutukdong maysadiri na pigngaranan na si Dominador Alcantara na yaon na sa kustodiya kan pulicia kan ciudad, sabi ni SPO2 Tobias Bongon parataram kan NCPO. Sinabi pa kan parataram kan Naga PNP, mga Molotov bomb an nakua kan mga awtoridad, tolong dekantong bote na may laog nin de unang mga pako, bobog nin bote asin may laog nin gasolina na magiging causa nin pagsabog, limang pana asin calibre 38ng badil na mayong licencia. Mga alas 10:00 kasuodmang Miercules nagresponde an NCPO sa osip kan nagkaperang residentes kan Sitio Mangapo gapo na naheling si Alcantara na nagwalat nin sarong plastic bag sa gilid kan kaduotan mga 30 metros an rayo hale sa saindang residencia. Sadit man na bagay kaipuhan magresponde an NCPO sa osip kan residentes kan sarong lugar nganing maogib kun positibo an informasyon na nagresulta sa acomplisimiento kan pulicia huli ta delicado sa aksidente kun napabayaan kan awtoridad asin gamiton nganing pasabogon, sabi sa mga pahayag sa media ni Acting City Director Jonathan Panganiban. Sa pakikipag-olay ni Bongon sa nagkaperang testigos si Alcantara soboot kun nabuburat ini nagpapatanid na igwa siyang bomba na puedeng pasabogon. An suspechado sarong carpentero, taga Calauag, Quezon na duwang taon palang sa Ciudad nin Naga na saiyang na-agom si Roselle Alcantara. Sinabi na kabale sa nakua kan PNP iyo an sarong surat para ki Ka Doming asin para ki Ka Josephine na hale sa pigngaranan na Benny. Dai gabos binasa sa media kan opisyal kan PNP envez si porsyon sana kaini na nagsasabi na naghahagad nin suporta. . . . asin sa huring parte kan surat ‘’Mabuhay an mga kapatid, mabuhay. . . .. An gabos na ini pig-iinvestigaran pa kun saen na grupo konektado an suspechado asin pig-aandam na an isasangat na caso.