Bordado nagvoto vs P1k budget sa CHR


An congresista kan tercer distrito kan Camarines Sur nagvoto contra sa propuestong P1,000 budget sa Commission on Human Rights (CHR) huli ta malinaw sa pigsumiter sa congreso kan Malacañan na sa 2018 national budget na nagcacantidad sa P3.767 trilyon na an ahencia igwang alokasyon na P623.38 milyon. Sa budget hearing sa Camara-Baja lusot na an P1,000 na prosupuesto sa CHR para sa masunod na taon 2018. Sinabi ni Congresista Gabriel H. Bordado Jr. kun nagvoto siyang contra huli ta base sa explanatory note kan House Bill 6215, sa pigsumiter ni Presidente Rodrigo Duterte sa congreso para sa 2018 National Budget asin sa saiyang ginibong State of the Nation Address, sinabi kan presidente na an sinambit na prosupuesto sarong inaapod niyang ‘’a budget that reforms and transforms’’, asin an CHR kabale digdi na magkakaigwang alokasyon na P623.38 milyon. Sa pinaluwas ni Bordado sa saiyang facebook, sinabi kaini na sa ginibong paggirumdon kan National Heroes Day ngonian na taon, na-unambitan an presidente kan sarong kolumnista na nagsabing ‘’Let us honor them by upholding the rule of law and fostering goodwill among ourselves.’’ Nagpangako pa an presidente na ipagpapadagos niya an giyera laban sa mga kriminal. An poder asin trabajo kan CHR nakapalaman sa constitusyon na kinababalehan kan pagprotehir kan derechos humanos kan gabos na persona sa Filipinas, maging si nag-eestar na Filipino sa ibang nasyon. Pagtao nin legal aid services sa mga ordinaryong namamanuan na an saindang derechos humano natitinak-tinakan o kaipuhan an saindang proteksyon. Mandato sa constitusyon na sa aprobadong national budget an Commission awtomaticong igwang dapat na ipaluwas na fondo huli ta base ini sa ley, ‘’I believe that it will be in the interest of the country to approve the P623.38 million originally earmarked for the CHR and not the P1,000 as proposed’’, sabi pa ni Bordado. Nagkaperang lider kan progresibong grupo sa Ciudad nin Naga asin Camarines Sur an saludo sa panindugan kan congresista sa tahaw kan rinibong mga biktima kan extra judicial killings asin nababalga an saindang derechos humanos paparalisaron pa poder asin trabajo kan CHR. Sabi kan sarong dating alcalde sa segundo distrito kan CamSur na nagsayuma nang magpasambit kan saiyang pangaran ‘’Maurag man talaga an prinsipyo ni Cong Bordado. (DPA)