SA IMPLEMENTASYON KAN SLF: Naaabala sa haloy na proceso sa ECC permit

Mawot nang maponan kan City Hall an implementasyon kan P260 milyon na Sanitary Land Fill (SLF) alagad naabala sa proceso kan mga documentos na rekisitos kan Department of Environment and Natural Resources (DENR) Bikol nganing ma-isyuhan nin Environmental Clearance Certificate (ECC). Ini an paliwanag ninda City Planning Officer Willy Prilles asin Engr. Joel Martin, pamayo kan Solid Waste Management Office kan lokal na gobierno kan sinda mag-atubang sa sesyon regular kan Sangguniang Panlungsod kan Martes, Septiembre 12 sa pagdetalye sa miembros kan consejo sa na-aabalang implementasyon kan proyecto. Sinda Prilles asin Martin, pinaapod kan SP sa pamamayo ni Bise Alcalde Nelson Legacion nganing hagadan nin paliwanag kun tano ta dai pa giraray na iimplementar an proyecto apesar na dapat mapunan kan Abril ngonian na taon. Sinabi ni Prilles na sagcod na dai pa na-isyu nin ECC permit an Environmental Management Bureau (EMB) kan DENR Bikol dai mapuponan an implementasyon kan SLF. Inaabot na nin lima hasta anom na semana na-aabala an proyecto asin afuera pa kaini, na-aabala pa an pagsangat nin expropriation case sa corte kan City Legal Officer para sa lote na gagamiton na access road pasiring sa lugar kan SLF. Sinabi sa Bicol Mail ni Engr. Martin na oras matapos na an mga kaulangan sa proyecto piglalaoman na posibleng maponan na an implementasyon sa bulan kan Oktubre o kun dai man sa Noviembre ngonian na taon envez kan dapat kan Abril 2017 mantang target na maging operational sa Abril 2018. Si Martin asin ENRO Officer Ramon Florendo nag-follow up na sa EMB kan saindang pendienteng aplikasyon sa ECC permit alagad igwa naman panibagong rekisitos kabale an water quality sa Yabo River na dapat pig-isyu kan ENRO, titulo kan daga na bubogtakan kan SLF asin iba pang kahagadan na papeles. Garong libro kahibog an documentos na pigsumiter sa DENR para sa hinahagad nindang aplikasyon sa ECC permit, sabi pa ni Martin. Diez hektarya an lote kan ciudad sa Barangay San Isidro na digdi ibubugtak an SLF na mauusar an 4.85 hektarya, afuera kan para sa hospital waste asin material recovery facility asin sunod na pig-aandam an haloy nang pangiturogan na waste to energy project. Huli kan ma-aabala an pagtapos kan SLF hinahagad kan SWMO ki City Engr. Chito Palmiano na tadaan sinda nin 40 por ciento kan maaponan pa nin basura envez na 30 por ciento mantang nagpapadagos pa an pagsara kan Balatas dumpsite.