Aniversaryo kan Martial law sasabaton nin mga protesta

Abot sa trece mil na lider asin miembros kan progresibong grupo maging hale sa iba pang sektores an nakatalaan na magparticipar sa protest rally ngonian na aldaw sa paggirumdom kan ika-45 aniversaryo kan Martial law na sarabay gigibohon sa mga provincia kan Kabikolan. Si James Casilihan, lider kan BAYAN Bikol nagsabi na kabale sa mga malansar nin kilos protesta iyo an grupo sa Camarines Norte, Ciudad Naga sa Camarines Sur, Albay, Masbate, Sorsogon asin Catanduanes na igwa nang mga pag-andam an maparticipar na grupo asin kaayon sa maatendir iyo an sektor nin paraoma. An progresibong grupo disganado sa administrasyon ni Presidente Duterte huli kan padagos na nangyayaring garadanan sa mga ginigibong giyera laban sa droga, padagos na nangyayaring extrajudicial killings asin dai man narerealisar si mga pangako sa namamanuan orog na sa kapobrehan. Kabale sa saindang idedenunciar iyo an halangkaw na mga caso sa pagbalga sa derechos humanos mala ngani gusto nang tunawon an Commission on Human Rights kan tagamahan sana nin P1,000 na budget para sa masunod na taon 2018. Sinabi pa na pasiring na sa pagiging diktador an presenting administrasyon Duterte na dapat dai magtugot digdi an publiko asin kaipuhan nang maghiro sa paagi kan mga protesta. An mga nag-kokontra sa saiyang administrasyon hinahapan nin mga paagi nganing masangatan nin caso asin laomon sa carcel asin dai na makahiro. An CHR na dapat magseguro sa mga atrocities kan awtoridad sa EJK’S, mga pagbalga kan militar asin pulis mawawara na huli kan kawaran nin fondo na gagamiton kan komisyon.