SA CAMARINES SUR: 40k masumpa sa PDP-Laban

Maabot sa cuarenta mil (40,000) na lideres politikal asin suportadores hali sa manlaen-laen na kampo politikal sa mga munisipyo hasta sa 1,034 mga barangay sa treinta y cincong banwaan asin duwang ciudades kan Camarines Sur, nakatalaan magsumpa sa Partido Demokratiko Pilipino Lakas ng Bayan (PDP-Laban) ni Presidente Rodrigo Duterte sa Oktubre alagad mayo pang pigtalaan na petsa. Enot pigtalaan kan Septiembre 14, 2017 sa Convention Center kan Capitolio Provincial kan Camarines Sur an pagpasumpa sa bagong miembros kan partido na papangenotan ninda PDP-Laban President, Senate Presidente Aquilino ‘’Koko’’ Pimentel asin House Speaker Pantaleon Alvarez alagad dai dinagos mientras na titikapohon sa panahon nin preparasyon asin sabay pa sa kasiribotan sa kapiestahan ni Nuestra Señora de Peñafrancia. Piglalaoman magkaigwa nin unidad an mga lideres politikal sa Camarines Sur na dating magcontra partido mientras na sinda Congresista Rolando Andaya Jr. kan premir distrito asin Congresista Noli Fuentebella kan ika-apat na distrito enot nang yaon sa PDP-Laban ni Duterte. Afuera pa kaini si 4th District Congressman Salvio Fortuno asin 3rd District Congressman Gabby Bordado Jr. na parejong yaon sa Partido Liberal asin 2nd District Congressman LRay Villafuerte na yaon sa NP, alagad sinda anas kaalyado sa PDP-Laban. Si dating Vokal asin ngonian Provincial Administrator Angel Naval nagsabi na posibleng idagos na sa masunod na bulan nin Oktubre ngonian na taon an lagdoan na pagpasumpa sa bagong miembros kan PDP-Laban asin piglalaoman na maabot mismo si Presidente Duterte, alagad dai na nagdetalye kan iba pang actividades sa surompaan mientras na luwas sa saiyang trabajo an politika. An rinibong lideres politikal puon sa Gobernador na papangenotan ni Migz Villafuerte, ibang congresista, mga vocal, bise alcalde, consejales, sundo sa mga barangay an magtiripon sa Capitolio Provincial alagad si Bise Gobernador Fortunato Peña piglalaoman na matenir sa Liberal Party ni Bise Presidente Leni Robredo. Kun sa cada barangay igwang cuarentang masumpa sa PDP-Laban hali sa 1,034 igwang total na 41,360. Si Gobernador Villafuerte, miembro kan Nationalista Party (NP) parejo kan saiyang ama na si Congresista LRay Villafuerte iyo an mangengenotan sa sinambit na actividad politikal na sagcod sa ngonian dai pa maaraman kun anong petcha sa Oktubre asin nganing mas andam an dakulang programa na maabot si Presidente Duterte posibleng gibohon sa laog kan Noviembre 2017. Kun labi sa 40 mil an ciertong masumpa sa partido macoconsiderar na record breaking an actividad na premirong mangyayari digdi sa Kabikolan an dakulang numero na mabalimbing nin partido politikal. FEDERALISMO Napag-araman na padagos na pinapakusog an partido politikal kan administrasyon nganing gamiton na makinarya an miembros kaini sa campaña sa federalismo sagcod sa ipapaapod na referendum. Si Presidente Duterte saiyang pigtutulod an forma federalismong gobierno na saro sa estratihiya pakusogon an partido kan administrasyon nganing gamiton sa itatalaan na pagpa-apod nin plebisito. (DPA)