Surompay na tubo kaipuhan kan LGU

Minalabac, Camarines Sur – Surompay na tubo bako lang hali sa 2nd Congressional District asin Capitolio Provincial kan Camarines Sur kun masumpa sa PDP-Laban an opisyales lokal digdi sa pamamayo ni Alcalde Cris Lizardo, mga miembros kan Sangguniang Bayan hasta sa saindang mga pusog na lider sa barangay. Kinumpirmar sa Bicol Mail kan jefe ejecutivo digdi na nag-aandam na sinda na magsumpa sa partido kan administrasyon sa pangenot ni Gobernador Migz Villafuerte na posibleng madagos na sa laog kan bulan nin Oktubre ngonian na taon na gigibohon sa Convention Center kan Capitolio. Maabot sinda sa total na 1,500 kabale an opisyales de barangay asin mga lider kan barangay nganing ipaheling an saindang pagkasararo sa pagsuporta sa administrasyon ni Presidente Rodrigo Duterte. Saiyang piglinaw na bako para sa saindang interes politikal an pagbalyo sa PDP-Laban envez nganing pacil an saindang paghagad nin mga ayuda asin proyecto maging sa Department of Public Works and Highways asin para pakinabangan kan saindang namamanuan. Sa ngonian an LGU Minalabac madaling makahagad nin proyecto ki Congresista LRay Villafuerte asin ki Gobernador Villafuerte na saindang kaibanan sa partido kan nakaaging pirilian kan Mayo 2016 asin kun yaon pa an Malacañan dakulang bagay para sa ano man na proyecto, sabi pa ni Lizardo. Mayo nang iriwal an jefe ejecutivo asin lehislatibo na nagtatarabangan bakong arog kan nagtalikod na administrasyon na mayong nangyari natapos si termino sa iriwal huli sa politika, sabi kan ibang opisyales lokal digdi.